له کابله خپرېدونکې ورځپاڼې(مسیر) پهخپله نننۍ سرلیکنه کې له چین سره د نښلېدونکي سړک په بشپړېدو بحث کړی دی. ورځپاڼې لیکلي: په بدخشان کې د کوچني پامیر له لارې چین نښلېدونکي سړک چارې بشپړې شوې او په نږدې راتلونکي کې به گټې اخیستنې ته وسپارل شي.: «د واخان تاریخي دهلېز د افغانستان او سیمې لپاره د ملا تیر حیثیت لري او د دې لارې د چارو په بشپړېدو سره به افغانانو ته په اقتصادي برخه کې ډېرې اسانتياوې برابرې شي.»
د سرلیکنې له مخې، دغه نوی سړک نه یوازې دا چې افغانستان له چین سره نښلوي، بلکې په سیمه کې د اقتصادي ودې او کاري فرصتونو د رامنځته کېدو په موخه د سیمې د خلکو لپاره هم ډېر مهم دی.: «د واخان تاریخي دهلېز د سیمې لپاره د اقتصادي ودې او پرمختگ لپاره یو مهم فرصت دی او د دې لارې د چارو په بشپړېدو او د چين بندر په بېرته پرانيستل کېدو سره به افغانانو ته په اقتصادي برخه کې ډېرې اسانتياوې برابرې شي.»
په سرلیکنه کې ویل شوي، د واخان تاریخي دهلېز د بدخشان په کوچني پامیر کې پروت دی او له اوږدې مودې راهیسې د افغانستان او چين ترمنځ د سوداگرۍ او اقتصادي همکارۍ لپاره یوه مهمه لاره گڼل کېږي. د دې لارې د جوړېدو او بیا پرانيستل کېدو سره به یو ځل بیا ختیځه اسیا له سوېلي اسیا سره ونښلوي او د ورېښمو تاریخی لارې بیا جوړېدل به د سیمې لپاره یو نوی فرصت وي.:«افغانستان په دې وروستیو کلونو کې د اقتصادي ودې او پرمختگ په موخه ګڼ شمېر بنسټیزې پروژې پيل کړې دي، چې د دې سړک جوړول هم یوه له دغو پروژو څخه ده. د دې لارې پرانيستل به نه یوازې دا چې د افغانستان اقتصاد ته یو نوې ساه ورکړي، بلکې د سیمې خلکو لپاره به هم د نوي ژوند او پرمختگ فرصتونه لا ډېر کړي.»
د سرلیکنې د لیکوال په باور، د افغانستان په ځانگړې توگه د بدخشان خلک د دې پروژې په بشپړېدو خوښ دي او هیله لري چې په نږدې راتلونکي کې به د دې سړک له گټو څخه برخمن شي. دغه سړک به د سيمې د خلکو ژوند ته نه یوازې اقتصادي اسانتیاوې راوړي، بلکې د کلتوري او ټولنیزو اړیکو د پراختیا لپاره به هم يو مهم گام وي. د دې پروژې په بریالیتوب سره به د افغانستان او چین ترمنځ د سوداگرۍ او اقتصادي همکاریو نوی پړاو پيل شي، چې دا به د سیمې د خلکو د ژوند د سطحې د لوړولو لپاره یو مهم پرمختگ وي.