په دې وروستیو کلونو کې، په افغانستان کې د مقاومت جبهه د یوه سیاسي لوبغاړي په توګه راڅرګنده شوې ده چې د آزادۍ، عدالت او د افغانانو د حقونو د دفاع دعوه کوي، خو د دغه شعارونو تر شا داسې شواهد شته چې ښيي دغه جبهه نه یوازې د ملي ګټو په خدمت کې نه ده، بلکې قومي تعصباتو ته یې لمن وهلې او د شکمنو فعالیتونو او حتی جاسوسۍ لپاره یې زمینه برابره کړې ده.
د مقاومت جبهې یو له څرګندو ځانګړتیاوو څخه، په ځانګړې توګه د تاجکانو په ګډون پر یوه مشخص قومي هویت باندې شدید تمرکز او د افغانستان د قومي تنوع له پامه غورځول دي. دغې جبهې د ځانګړو سمبولونو، ژبې او تاریخي روایتونو په کارولو سره، هڅه کړې چې قومي احساسات راوپاروي او نور قومونه حاشیې ته کړي.
په مقاومت جبهه کې د قومي تعصب یوه روښانه بېلګه، په بیانیو او تبلیغاتو کې یوازې د دري ژبې د تاجکي لهجې کارول دي، پرته له دې چې د افغانستان نورو ژبو ته پاملرنه وشي. همدارنګه د تاجیکو د نظامي قوماندانانو یو اړخیزه ستاینه او په افغانستان کې په تېرو مبارزو کې د نورو قومونو د رول له سترګو غورځول، د دې جبهې قومي تعصب څرګندوي.
په ټولنیزو شبکو او اړوندو رسنیو کې د مقاومت جبهې د غړو له خوا د پښتنو او هزاره قومونو پر مشرانو لفظي او د سپکاوي ډک بریدونه، د دې ډلې دننه قومي بغض او کینه ښيي.
مقاومت جبهه د نا امنیو او مجازي سیاسي لانجو له رامنځ ته کولو څخه په ناوړه ګټې اخیستنې سره، هڅه کړې چې ځان د سرپرست حکومت په وړاندې یوازینی مشروع انتخاب وښيي. خو په حقیقت کې، دغې جبهې د نا آرامۍ او رسنیزو لانجو په راپارولو سره، ډېر د خپل قومي منزل د ټینګښت په لټه کې دي او د یوې آرامې، آبادې او سالمې ټولنې د جوړېدو مخه نیسي.
په وار، وار ثابته شوې ده چې مقاومت جبهه له بهرنیو استخباراتي ادارو سره اړیکې لري. د دې ډلې اړیکې د ځینو هېوادونو سره چې په افغانستان کې د خاصو ګټو په لټه کې دي، د دې لامل شوې چې د دې جبهې استخباراتي او جاسوسي فعالیتونه د هغو هېوادونو له خوا ملاتړ شي.
د مقاومت جبهې تعصبي کړنې په ډېرو مواردو کې د قومي درزونو د پراخېدو لامل شوې دي. ډېری افغانان، په ځانګړې توګه غیر تاجیک قومونه، دا جبهه یوه قومي ډله ګڼي، نه یو ملي حرکت؛ دغه جبهه یوازې د خپلو محدودو ګټو په لټه کې ده.
د افغانستان دننه سیاسي او ټولنیزو نخبه ګانو او په سیمه ایزه کچه، هغو هېوادونو چې د افغانستان د ثبات ملاتړ کوي، د مقاومت جبهې د تخریبي رول په اړه خبرداری ورکړی او اندېښنه یې څرګنده کړې ده. دا غبرګونونه د افغانستان او سیمې پر امنیت د دې جبهې د کړنو منفي اغیزې څرګندوي.
افغانان ښه پوهېږي چې رښتینی مقاومت باید د ملي یووالي، ټولنیز عدالت او سیاسي خپلواکۍ پر بنسټ جوړ شي. هغه جبهه چې پر قومي تعصب او بهرنۍ وابستګۍ ولاړه وي، نه شي کولای د خلکو استازیتوب وکړي او نه هم د هغوی له حقونو دفاع وکړي.
څه چې د مقاومت جبهې د خامو مشرانو او وابستګانو له کړنو څخه څرګندیږي، دا جبهه د قومي تعصب او جاسوسۍ لپاره په یو بستر بدله شوې ده. د دې حقایقو افشاء کول او افغانانو ته پوهاوی ورکول کولای شي د اصلاحاتو او د هېواد د ملي ګټو او ټولو قومونو خدمت لپاره زمینه برابره کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.