هندوکشغږ ته تازه رسېدلي معلومات ښيي چې مقاومت جبهې د امريکا ولسمشرۍ ته د ډونالډ ټرمپ له راتګ وروسته په ډېر شدت سره امريکا او غرب ته د لا نږدې کېدو لپاره خپلې هڅې تیزې کړې دي.
تازه احمد مسعود د مقاومت جبهې د بهرنيو اړيکو مسؤول علي ميثم نظري ته په دې اړه نوې دندې ورکړې او سپارښتنې یې ورکړې دي او ټينګار يې کړی دی چې د امريکا او غربي متحدينو سره يې د اړيکو په برخه کې خپلې هڅې تيزې کړي.
په همدې هدف د احمد مسعود په هدايت د يادې جبهې د سياسي اړيکو/دفتر مسؤول عبدالله خنجاني ترکيې ته سفر کړی او هلته يې د پخوانيو سياسي څهرو لکه دوستم، سياف، عطا محمد نور او محمد محقق سره ليدنې کړي دي.
هندوکشغږ ته د رسېدلو کره او موثقو معلوماتو په اساس د دې لیدنو اساسي اجنډا هم د اسلامي امارت د سياسي مخالفينو د واحد چتر رامنځ ته کولو په اړه د مقاومت جبهې او مقاومت شوری ته د غربي هيوادونو د پيغام انتقال او ورباندې بحث وو؛ دغه جبهه او شوری په دې هڅه کې دي چې د غرب خصوصا د انګلستان او امريکا په ځانګړي ډول د ټرمپ د ټيم په حمايت تر يو واحد چتر لاندې د اسلامي امارت مخالفين راټول کړي.
هندوکشغږ ته د رسېدلو معلوماتو په اساس د دې پروژې لپاره له مقاومت جبهې سره د انګلستان په شمول د غربي هيوادونو له لوري تازه د يو ميليون ډالرو مرستې ژمنه شوې ده چې يوه برخه يې د انګلستان له لوري ورته ورکړل شوې هم دي.
د مقاومت جبهې له دې خپلسريو او غرب پالنې څخه ايران ډېر په انديښنه کې دی؛ تازه يې مقاومت جبهې ته څو ځله يادونې او سپارښتنې کړې دي چې له غرب سره د نږدېوالي څخه ډډه وکړي، خو بالعکس احمد مسعود بيا خپله او د علي ميثم نظري او عبدالله خنجاني په توسط د غرب او امريکا سره د اړيکو د لا قوي کولو لپاره خپل فعاليتونه تېز کړي دي چې په مقابل کې يې ايران هم په ايران کې د مقاومت جبهې له دفترونو سره خپلې مرستې بندې کړې او تازه يې نور محدوديتونه هم ورباندې راوستلي دي.
ايران د مقاومت جبهې لخوا ډونالډ ټرمپ ته د مبارکۍ ورکولو په اړه هم له شخصي لارو خپل غبرګون ښودلی، ځينې د ايران سپاه پاسداران ته نږدې رسنیو لکه تسنيم افغانستان او نورو د مقاومت جبهه د احمد مسعود د کورنۍ انحصاري ډله بللې او د تأديب په شکل يې ليکي دي چې د مسعود کورنۍ د ټرمپ د بريا د لومړنيو مبارکي ورکوونکو څخه شول!
هندوکشغږ ته د رسېدلو کره معلوماتو په اساس مقاومت جبهه د انګلستان د استخباراتو او سي آي اې(CIA) لپاره کار کوي او د غربي استخباراتي سازمانونو له لارې په مستقيم او غير مستقيم ډول د اسرائيلو استخباراتو ته هم کار کوي، اسرائيل چې په نړۍ کې د ايران د نفوذ د مخنيوي او کمزوري کولو لپاره فعاليت کوي؛ په ايران کې د مختلفو وجوهاتو له مخې ورته مقاومت جبهه، د مقاومت شوری ځينې څهرې او نورې امارت ضد ډلې يو ښه ابزار دی او تر دې پوښښ لاندې کولای شي په ډيره آسانۍ سره خپل د ضرورت وړ معلومات راټول او انتقال کړي.
د هندوکشغږ د مؤثقو او کره معلوماتو په اساس څه موده مخکې هم په تاجکستان کې د امريکا د سي آی اې سازمان د مسؤولينو او د مقاومت جبهې د ځينو کسانو تر منځ ليدنې شوې وې، همدارنګه په تېرو څو مياشتو کې د فرانسوي الاصله يهودي جاسوس او ميليونر برنارد هنري ليوي او احمد مسعود او د مقاومت جبهې د خارجي او سياسي کميټو له مسؤولينو سره ليدنې او کتنې زياتې شوې دي.
برنارد دغه راز څه موده مخکې د عبدالرشيد دوستم سره هم ليدنه کړې ده؛ داسې اطلاعات شته چې مقاومت جبهه او ځينې نور پخواني سياسيون او نظاميان د برنارد له لارې په غير مستقيم ډول اسرائيلو ته هم جاسوسي کوي.
برنارد هنري لوي يو سرسخت يهودي او د طالبانو او ايران د سرسختو مخالفينو څخه دی او په ښکاره ډول له غزې څخه د مسلمانانو او فلسطيني مجاهدينو د له منځه وړلو او ختمولو حامي او طرفدار دی، هغه په يوه تازه ليکنه کې چې اسرائيلي رسنیو هم نشر کړې ده؛ غزه يې د اسرائيلو اصلي خاوره ياده کړې.
تحليل ګران په دې نظر دي چې د مقاومت جبهې روابط او ملګري له ايران سره تکتيکي بڼه لري او د دوی د روابطو اصلي او ستراتيژيک اړخ له غرب سره دی چې اوس د ټرمپ په بريا سره د دوی هيلې او اميدونه نور هم ډېر شوي دي نو ځکه غواړي د ايرانيانو سره نور له خپل تړون څخه ځانونه خلاص او له غرب سره خپلې اړيکې مضبوطې کړي.