د ملګرو ملتونو سرمنشي انتونیو ګوترېش د افغانستان په تړاو په خپل راپور کې په سیاسي او امنیتي چارو کې پرمختګونه، سیمه ییزې همکارۍ، بشري حقونه او اقتصادي مسایل ارزولي دي.
ګوترېش په خپل تازه درې میاشتني راپور کې، چې د ۲۰۲۴ کال له نومبره د ۲۰۲۵ کال تر جنورۍ پورې مودې ته په کې کتنه شوې، ویلي چې په دې موده کې د امنیت ضد پېښو کچه د تېر کال د همدې مودې په پرتله ۱۶.۸ سلنه کمه شوې ده.
د ملګرو ملتونو سرمنشي په دغه راپور کې پر امنیتي مسایلو سربېره، پر حکومتولۍ، سیاسي پرمختګونو، سیمه ییزو همکاریو، بشري حقونو، اقتصادي مسایلو او د کډوالو په وضعیت هم تمرکز کړی دی او په دې سربېره یې ويلي چې، په تېر ۲۰۲۴ کال کې د افغانستان اقتصاد ۲.۷ سلنه وده کړې ده.
د راپور له مخې، په تېرو درېیو میاشتو کې له ایران او پاکستانه څه باندې ۳۵۰ زره افغان کډوال بېرته هېواد ته راستانه شوي.