محمد فیصل
ډېرو په اصطلاح کارپوهانو داسې ګومان کاوه چې دا ځل به هم ممکن د طالبانو حکومت (افغان حکومت) لکه د تېر په څېر له ډیرو ننګونو او ستونزو سره مخ وي، خو افغان حکومت هر څه برعکس ثابت کړل.
اوس د تیر برعکس افغان حکومت په ټول افغانستان واکمن دی، وسله وال مخالفت نشته او سیاسي مخالفین یې ویشلي او تیت و پرک دي، لکه د تیر په څیر ګاونډیان او نړیواله ټولنه هم د افغان حکومت پر ضد یوه خوله نه دي او تر منځ یې اختلافات شته.
دا د افغان حکومت بریالۍ ډیپلوماسي ده چې سیمه او د نړۍ دوه لوی سیاسي-نظامي هیوادونه (چین-روسیه) یې د ځان ملګري کړي او د دوی د ګټو ملاتړ کوي.
هغه هند چې تیر ځل یې د اسلامي امارت حکومت سره هیڅ ډول اړیکې نه درلودې او د مخالفینو (شمال ټلوالې) ملاتړ یې کاوه، دا ځل یې افغانستان سره مرستو ته ادامه ورکړې، تماس چینلونه یې فعال ساتلي او د افغان حکومت په ملاتړ یې پلاوی د هرات سلما ډیم کتنې ته راځي.
یادو هیوادونو درک کړې او اوسنی افغان حکومت د افغانستان د یو واقعیت او یوازیني مسوول حکومت په توګه مني او ځینو کورنیو مسایلو باندې پوهیږي چې حل یې وخت ته اړتیا لري.
اوس چې موږ د ملګرو ملتونو بدلیدونکو دریځو ته ګورو نو باوري کیږو چې دوی هم ورو ورو افغان حکومت د افغانستان د یو واقعیت او یوازیني مسوول ادرس په توګه مني.ملګري ملتونه له تعامل پرته بله لار هم نه لري.
پرون د افغانستان له پاره د ملګرو ملتونو مرستندویه ادارې (یوناما) مشرې روزا اتونبیا د امنیت شورا غونډې ته ویلي چې دوی باید له طالبانو (افغان حکومت) سره تعامل وکړي او د دې له پاره اړتیا هم ده.
موږ پوهیږو چې ملګري ملتونه به ډیر ژر قانع شي او هغه کورنۍ ستونزې چې اوس افغانستان کې شته، که خدای کول یوه حل لاره به ورته راوویستل شي.ملګرو ملتونو امنیت شورا ته په کار ده چې بندیزونه ختم کړي، افغان حکومت د یوازیني مسؤل او ادرس په توګه ومني او د ملګرو ملتونو څوکۍ افغان حکومت ته وسپاري.
موږ باوري یو او د ملګرو ملتونو له وروستیو دریځو څخه مالومیږي چې دوی به نږدې راتلونکي کې د افغان حکومت په خبرو قناعت وکړي او افغان حکومت به د نړیوالې ټولنې برخه شي.