د ملگرو ملتونو سر منشي انتوني گوترېش وايي، نړۍ هر کال تودېږي، چې د همدې سختې تودخې له امله یو نیم مېلیون انسانان خپل ژوند له لاسه ورکوي.
نوموړي ویلي، په ټوله نړۍ کې د تودوخې درجه په تېره اوونۍ کې بې ساري کچې ته لوړه شوې، چې د جولای ۲۱مه تر ټولو د ډېرې ګرمې ورځې په توگه ثبت شوه.:«که یو شی وي، چې زموږ وېشل شوې نړۍ سره یوه کړي. نړۍ ورځ تر بلې گرمېږي، چې اغېزې یې موږ ټول حس کوو.»
د ملگرو ملتونو سر منشي وویل، د تودوخې درجه په ټوله نړۍ کې د هر چا لپاره لوړه شوې، چې دې کار په مېلیاردونو خلک اغېزمن کړي او د تودوخې درجه ۵۰ درجو ته لوړه شوې ده.: «د تودوخې څپې د صحرا دښتې په سوېل، امریکا، سعودي عربستان او اسیا او افریقا کې وژوونکي اغېزې کړي او په ځینو ځایونو کې یې ښوونځي تړلي دي.»
گوترېش زیاته کړه، سخته تودوخه هر کال د نیم مېلیون څه د ډېرو خلکو د مړینې لامل کېږي. دا د استوایی توپانونو له امله د رامنځته کېدونکو ځاني تلفاتو نه ۳۰ برابر ډېر دي.
گوترېش د سختې تودوخې اصلي لاملونه د فوسیل د سونگ توکو کارول او اقلیمي بدلون یاد کړل.: «سخته تودوخه اوس زموږ نوې غیر معمولي حالت دی.»
نوموړي وویل، سخته تودوخه په ټولو یو شان اغېزه کوي، خو د بېوزله خلکو، امېدواره مېندو، مېرمنو، معیوبو، سپینږیرو او ماشومانو ژوند ډېر ګواښي.
گوترېش ویلي، د سختې گرمۍ له امله ۷۰ سلنه کاري ځواک له خطر سره مخ دی او د مېلیونونه انسانانو خوراک یې هم اغېزمن کړی دی.: «پیغام روښانه دی. تودوخه مخ په لوړېدو ده. سخته تودوخه خلک او سیارې اغېزمنوي. نړۍ باید د تودوخې د ډېرېدو سره د مبارزې لپاره هڅې وکړي.»