د بهرنیو چارو وزارت د عامه اړیکو رئیس حافظ ضیاء احمد تکل په یوه خبرپاڼه کې ویلي چې د دغه وزارت سرپرست مولوي امیرخان متقي د هند بهرنیو چارو وزارت استازي او د افغانستان، ایران او پاکستان د څانګې مشر آنند پرکاش سره کتلي دي.
د ښاغلي تکل په وینا، دغه ناسته کې د دواړو هېوادونو ترمنځ پر دوه اړخیزو سیاسي اړیکو، سوداګرۍ، ټرانزیټ او وروستیو سیمهییزو سیاسي حالاتو خبرې وشوې.
د بهرنیو چارو وزارت سرپرست د افغانستان او هند ترمنځ د ډیپلوماټیکو او اقتصادي اړیکو پر پراختیا ټینګار کړی او ویلي یې دي چې، افغانستان کې اوسمهال د پانګونې لپاره ښه فرصتونه برابر دي او هندي پانګوال دې له دغه فرصتونو په استفادې پانګونه وکړي.
ښاغلي متقي د دواړو هېوادونو ترمنځ د خلکو تګ راتګ په برخه کې د اسانتیاوو په رامنځ ته کولو ټینګار کړی او ویلي یې دي چې، د سوداګرو په شمول دې افغان ناروغانو او محصلانو ته د وېزو ورکړه عادي حالت ته راوګرځول شي.
له بل لوري د هند د بهرنیو چارو وزارت استازي انند پرکاش ویلي چې، هېواد ته یې له افغانستان سره اړیکې مهمې دي او هیله مند دی چې په مختلفو برخو کې اړیکې نورې هم پراخې کړي.
نوموړي زیاته کړې، چې هند له افغانستان سره خپلو همکاریو ته دوام ورکوي او غواړي چې په ځینو بنسټیزو پروژو کې پانګونه هم وکړي.