د استخباراتو لوی ریاست رئیس مولوي عبدالحق وثیق ویلي، چې د ا.ا.ا په لاس په ۲۰۲۱ کال کې پرځول شوی جمهوریت د بهرني ښکېلاک محصول و او د هغې سیاسي جوړښت او ارزښتونه د افغانستان د ولس له عقیدې او ارزښتونو سره په ټکر کې وو.
ښاغلي وثیق له الجزیرې شبکې سره په ځانګړې مرکه کې زیاته کړې، چې یادې ادارې د ښکېلاکګرو لپاره د نقاب حیثیت درلود او له هغوی څخه یې دفاع کوله.
هغه ویلي، چې پرځول شوی جمهوریت کې د فساد کچه، د قدرت جزیرې او پر ولس ظلم تر ټولو لوړې کچې ته رسیدلی وو، د کار ساحه یې د بهرنیانو له لوري تعینېدله؛ خو د اوسني افغان حکومت د کار ساحه د اسلامي شریعت او ملي منافعو په رڼا کې تعین شوې، هغوی سرې کرښې نه درلودې؛ خو اسلامي امارت سرې کرښې لري.
د استخباراتو لوی رئیس په خپلو خبرو کې دا هم ویلي، چې د افغانستان په تاریخ کې د لومړي ځل لپاره د استخباراتو د چارو د تنظیم لپاره یو بشپړ او جامع قانون جوړ شوی، چې ټول مواد یې د اسلامي شریعت او حنفي فقهې پر بنسټ ترتیب شوي دي.