د ننګرهار ولایت مقام رسنیز دفتر وایي، د دغه ولایت بهسودو ولسوالۍ اړوند خانکي ښارګوټي کې راستنو شويو کورنيو ته د ځمکو د وېش لړۍ پيل شوه.
ياد ښارګوټی چې درې زره جريبه ځمکه لري، په کې پنځه زره نمرې راستنو شويو کورنيو ته ځانګړې شوې دي.
سرچینه زیاتوي، چې دې ښارګوټي کې به د انکشافي پلان له مخې جوماتونه، پارکونه، مدرسې، ښووونځي، دارالعلوم، کلينيک، د اوبو رسولو شبکې، مخابراتي سايټونه او نورې پروژې هم پلې شي.
د کور او ښار جوړولو وزير ويلي، چې د مشرتابه د حکم له مخې له کوم خنډ پرته په ټول هېواد کې راستنو شويو هېوادوالو ته د نمرو وېش پيل شوی او ډاډ يې ورکړی، چې په ښارګوټو کې به د ژوند ټولې اسانتياوې رامنځته شي.