د یونپس په مالي ملاتړ د ننګرهار ولایت د کلیو، بیا رغونې او پراختیا ریاست له لوري په پچیراګام، رودات، مومنددرې او کوټ ولسوالیو کې د ۷۰۳ میلیونه افغانیو په لګښت ۵۲۱ بېلابېلې پروژې پلې او ګټې اخستنې ته سپارل شوې دي.
د مالوماتو پر بنا په دې پلې شوو پروژو کې ۹۰ کیلو متره نوي سړکونه، ۱۵۵ کیلو متره د سړکونو ترمیم او جغل اندازي، ۱۱ کیلو متره سړکونو کانکرېټ، ۳۵ کیلو متره استنادي دېوالونه، ۱۰۶۷ پلچکونه، ۶۲۷ کیلو مترو ویالو او کانالونو پاک کاري، ۱۱ کیلو مترو کانالونو کانکرېټ رېزي، ۱۵ برېښناکوټونه او ۵۵ د اوبو واړه ډیمونه جوړ شوي دي.
د یادو پروژو د پلي کېدو پر مهال ۳۲ زره کسانو ته د کار زمینه هم برابره شوې وه.
د یوه بل خبر له مخې تېره ورځ هم د فراه په ولایت کې د څه باندې ۳۷ میلیونه امریکایي ډالرو په لګښت بیلابیلې پروژې پلې شوي دي.
د یاد ولایت د اقتصاد رییس جمال الدين جلالي وایي؛ د روان ۱۴۰۲ کال کې له دې ریاست سره ۴۲ غير دولتي موسسې ثبت شوي، چې د همدې موسسو په مټ د ۳۷ میلیونه ۵۶۱ زره ۳۷۱ ډالرو په لګښت د روغتيا، پوهنې، کرنې, ښوونې، زیربنایي, پيښو، کډوالو، ټولګټو، شهيدانو او معلولينو په برخو کې ۸۲ پروژې پلې شوې دي.
د جلالي په وینا، چې د يادو پروژو له لارې ټولټال ۱۸۴۸ نارينه، او ښځينه وو ته پکې د کار زمينه برابره شوې وه.