د ننګرهار ولايت مقام د خبرپاڼې له مخې د ننګرهار والي ملا محمد نعيم آخند د دغه ولايت ځايي مسؤلینو ته د يوې ځانګړې ناستې په ترڅ کې په جدي ډول امر کړی، چې په پاتې محدودو سيمو کې هم د راکړې ورکړې پرمهال د پاکستانۍ کلدارو د کارونې مخنيوی وکړي او افغانۍ په بشپړ ډول ترويج کړي.
د سرچينې په وينا، نوموړي ویلي چې شينواري، سپين غر، اچين، لعلپوره، مومندره، نازيان او دوربابا هغه ولسوالۍ دي، چې د کلدارو چلښت پکې محدود دی، خو بايد په بشپړ ډول يې مخنيوی وشي او ټوله راکړه ورکړه په افغانيو ترسره شي.
ياده دې وي چې واک ته د سرپرست حکومت له رسېدو راوروسته د حکومت مشرتابه په يوه ځانګړي فرمان کې په ټول هېواد کې د بهرنيو اسعارو په کارونې بنديز اعلان کړ او له هغې راوروسته د هېواد په ګڼ شمېر سرحدي ولايتونو کې د دې چارې مخنيوی شوی دی.