د مالیې وزارت وايي، د تورخم گمرک د ترانزیت د تشرېح مدیریت کارکوونکو په یوې سوداگریزه کڅوړه کې د هغو وسلو د راوړلو مخینوی کړی، چې له پاکستان نه ننگرهار ته راوړل کېدې.
له یاد وزارت څخه په خپره شوې خبرپاڼه کې ویل شوي، په نیول شوو وسلو کې ۱۶ عدده تومانچې، ۲۳ عدده شاجورونه او ۳۱۵ عدده مرمۍ وې، چې په سوداگریزه کڅوړه کې په ډېر مهارت ځای پر ځای شوې وې.: «یاد مهم چي په قاچاقي توگه له گاونډي هېواد پاکستان څخه افغانستان ته راوړل کېدل په تړاو یې یو تورن کس هم نیول شوی او د نورو څېړنو په موخه اړوندو ارگانونو ته سپارل شوی دی.»
په خبرپاڼه کې ویل شوي، د مالیې وزارت د گمرکونو کارکوونکي شپه او ورځ کار کوي، څو هېواد ته د هر ډول ناقانونه او ممنوعه توکو له واردولو مخه ونیسي.
له دې وړاندې هم له پاکستان څخه د تورخم له لارې د گڼو چاودېدونکو توکو مخه نیول شوې ده.
په خبرپاڼه کې نه دي ویل شوي، چې یادې وسلې په کومه موخه راوړل کېدې.