د ننگرهار د کلیو د بیارغونې او پراختیا ریاست مسوولین وايي، د دې ادارې او د یونسیف ادارې په مالي د ننگرهار د مومندرې ولسوالۍ اړوند تورخم ښارگوټي کې د اوبو رسولو د دوو شبکو د جوړولو چارې پیل شوې دي.
د یاد ریاست څخه په خپره شوې خبرپاڼه کې ویل شوي، د اوبو رسولو دغه شبکه د بېرته راستنېدونکو هېوادوالو ته د پاکو اوبو رسولو په موخه جوړېږي.
د خبرپاڼې له مخې، یادې شبکې د اته مېلیونه او ۲۰۰ زره افغانیو په لگښت جوړېږي، چې ۳۴ لمریزې تختې او دوه بابه ۵۰ زره لیتره ذخیرې لري، چې په مټ به یې تر ۷۵۰ بېرته راستنېدونکو کورنیو ته د څښاک پاکې اوبه برابرې کړي.
له تېرو څو میاشتو راهیسې پاکستان د افغان کډوالو په جبري ستنولو پیل کړی، چې تر دې مهاله زرگونه کورنۍ بېرته هېواد ته راستنې شوې دي.
د افغان حکومت بېلابېلو ادارو په تورخم ښارگوټي کې د بېرته راستنېدونکو لپاره د پاکو اوبو، لنډمهاله پنډغالي، ۲۴ ساعته برېښنا، تر خپلو اصلي مېنو رسول، روغتیايي خدمتونه او درې وخته ډوډۍ ورته چمتو کړې وه.