د ننگرهار د کرنې، اوبو لگولو او مالدارۍ ریاست مسوولین وايي، سږ کال په دغه ولایت کې د ځمکنیو توتانو کښت ډېر شوی او سږني حاصلات به یې ۳۱۰ ټنو ته ورسېږي.
له یاد ریاست د معلوماتو پر بنسټ، ځمکني توتان اوسمهال د ننگرهار په سرهرود، خوږیانیو او درهنور ولسوالیو کې پر ۱۷۵ جریبه ځمکه کرل شوي دي، چې پرو سږکال پر ۶۰ جریبه ځمکه کرل شوي و او حاصلات یې هم ۲۶۲ ټنه وو.
د کرنې ریاست مسوولین وايي، ځمکني توتان د کوکنارو ښه بدیل دی او د کر د پراختیا لپاره یې هڅې روانې دي.
د ځمکنیو توتانو کاروبار کوونکي هم وايي، چې د ځمکني توتانو اخیستونکي او مینهوال ډېر شوي او هره ورځ په کافي اندازه ځمکني توتان پلوري او ښه عاید ترې هم تر لاسه کوي.افغانستان د ځمکنيو توتانو کرکېلې لپاره مناسبه هوا او اوبه لري.
ځمکني توتان په لويه کچه د ويټامين سي تر څنگ په خپل ترکيب کې نور ويټامينونه هم لري چې د انسان روغتيا لپاره گټور بلل کېږي.
دځمکنيو توتاتو هر بوټی هرځل له يوه تر يونيم کيلو گرامو پورې په پرلهپسې ډول تر څلورو کلونو پورې حاصل ورکوي.