د ننګرهار پوهنتون ساینس پوهنځي ریاضي څانگې د څلورم ټولگي محصلینو له لوري جوړې شوې ډرون الوتکې ته د پوهنتون د مشرتابه غړو، استادانو او راغلو مېلمنو په حضور کې بریالۍ ازمايښتي الوتنه ورکړل شوه.
له ننگرهار پوهنتون څخه په خپره شوې خبرپاڼه کې ویل شوي، په دغه غونډه کې د ننگرهار پوهنتون رئیس انعام الله مدني د محصلانو له لوري د ډرون الوتکې جوړول ستره لاسته راوړنه وبلله او یادو محصلانو ته یې د هر ډول همکارۍ ډاډ ورکړ.
نوموړي له محصلانو وغوښتل چې د صنعت په برخه کې خوځنده واوسي او په بېلابېلو برخو کې دې نوښتونه وکړي.
د ساينس پوهنځي محصل عبدالباسط سمير چې د خپلو ملگرو په مرسته او د استادانو په لارښوونه يې دغه F22 ماډل ډرون الوتکه جوړه کړې وويل، ياده ډرون الوتکه يې له (کاک) کاغذ څخه د يوې مياشت په موده کې جوړه کړې او کولی شي چې تر ۵۰۰ متره ارتفاع او يو نيم کيلو متر په اوږدوالي الوتنه وکړي او د خپل وزن سربېره ۵۰۰ گرامه وزن پورته کړي.