لیکوال: اېمل پښتون
د روسیې بهرنیو چارو وزیر سرګي لاوروف: طالبان د ترهګرو سازمانونو له نوملړ څخه باسي. سرګي لاوروف له رسنیو سره په خبرو کې ویلي چې طالبان یو رښتینی ځواک دی او دوی هېڅکله له افغانستانه خپل سفارت نه دی وېستلی او له اسلامي امارت سره نږدې اړیکه کې دي.
دا رنګه دغه هېواد وخت ناوخت یو شمېر مهمو غونډو ته هم د طالبانو استازي وربولي.
تازه رویټزر خبري اژانس رپوټ ورکړی، چې روسیې په خپله لویه کلنۍ اقتصادي ناسته کې د ګډون لپاره اسلامي امارت ته هم بلنه ورکړې ده.
روسیه چې د سیمې او نړۍ په کچه یو له لویو زبرځواکو هیوادونو څخه دی، له اسلامي امارت سره یې د تعامل اړیکې ورځ تر بلې په قوي کېدو دي، چې دا د افغانستان او امارت لپاره ډېر ښه او مثبت اړخ دی. له تور لیست څخه د چارواکو تر ایستلو وروسته به ډېر زر مسکو له چین سره په تفاهم د رسمیت پېژندنې لړۍ هم پیل کړي.
تر چین، هند، ایران او روسیې ورهاخوا امریکا او اروپا هم منلې ده، چې اسلامي امارت د افغانستان یوازینی قوت او واقعیت دی. د طالبانو بهرنی سیاست بریالی، په واقعیتونو ولاړ او متوازن دی.
نړۍ قانع شوې ده، چې افغانستان سره له تعامل پرته بله لار نه لري او دا یې هم منلې ده، چې اسلامي امارت د افغانستان رښتینی قوت دی، چې هېڅ بدیل نه لري. طالبان بهرني سیاست کې بریالي روان دي، ځکه هممهاله هم دوحې او هم روسیې ته غونډو ته بلل کېږي.
توازن او اقتصادي اړیکې پیاوړي کول یې مهم ګامونه دي.له بل پلوه د نړۍ د یو قوي هېواد ولسمشر او په افغانستان کې ماتې خوړونکی جوبايډن د افغانستان په اوسني امنیت اعتراف او د امپراطوریو هدیره بلل ېې ډېره لویه خبره ده.
دا هغه اعترافات دي، چې نړۍ یې د اسلامي امارت پر قوي رهبریت، جغرافیوي واڪ او اقتصاد محوره سیاست باندې کوي.د روس، امریڪا او چین لویو زبر ځواڪو هېوادونو ترمنځ د اړیڪو توازن او پدې منځ ڪې په منځنۍ ڪچه د سیمې له بېلابېلو هېوادونو سره د اسلامي امارت تعامل له یو قوي رهبریت څخه اداره ڪېږي، بهرنی سیاست مو بریالی سیاست دی، نړۍ هم پرته له تعامل څخه بله لاره نه لري.
د روسي چارواکو تازه څرګندونو ته په کتو داسې معلوميږي، چې د اسلامي امارت بهرنی سیاست معقول او بهرنیو هېوادونو ته د قناعت وړ دی، کیدای شي په اول ځل روسیه هیواد د افغانستان اسلامي امارت په رسمیت وپېژني، چې دا به امریکا او د امریکا ملاتړي هېوادونو خپله دې ته مجبور کړي، چې امارت په رسمیت وپېژني.