د هرات د عامې روغتیا ریاست مسوولین وايي، په دغه ولایت کې د لومړي ځل لپاره په یوه خصوصي روغتون کې د زړه د پرانیستي عملیاتو څانگه پرانیستل شوې ده.
د هرات له ولایت مقام څخه په خپره شوې خبرپاڼه کې ویل شوي، له دې وروسته به د زړه ناروغۍ لرونکي افغان ناروغان بهر ته نه ځي، بلکې په کور دننه به عملیات کېږي.: «د هېواد په ځانگړي ډول د لوېدیځې حوزې خلکو لپاره غوره زېری دی او له هېوادوالو غواړو، چې د درملنې په برخه کې پر داخلي ډاکټرانو باور وکړي او خپله درملنه دې دلته وکړي.»
د لقمان حکیم خصوصي روغتون مشر عبدالستار تائب وايي، د زړه پرانیستي عملیاتو ته یې مجهز امکانات برابر کړي او ډاکټران یې هم د دې برخې متخصصین دي.
که څه هم د کابل په گډون د هېواد په ټولو ولایتونو کې گڼ خصوصي روغتونونه جوړ شوي او د بېلابېلو امکاناتو خبره کوي؛ خو لا هم له بهرنیو هېوادونو د افغان ناروغانو مخ نه دی اوښتی او لا هم خپله درملنه بهر کوي.