د افغانستان برېښنا شرکت وايي، هرات کې د ۶۴ میلیونه ډالرو په لګښت د ۲۰۰ میګاواټه په ظرفیت سره د بادي برېښنا تر ټولو ستره پروژه او ورسره په څنګ کې د ۵ ميګاواټه لمريزې برېښنا پروژې پرانيستل شوې.
د برېښنا شرکت اجرائيوي مشر ډاکټر عبدالباري عمر د دغې پروژې د پرانیستې مراسمو ته ویلي، د برېښنا د یادې پروژې لومړی فاز د ۴۳.۲ میګاواټه برېښنا د تولید ظرفیت لري.
ښاغلي عمر زياته کړې، چې افغانستان ته له لسیزو راهیسې د برېښنا انرژۍ د توليد په برخه کې يوازې ۲۵۰ مېګاواټه ظرفيت را پاتې وو؛ خو اوس کابو هره اوونۍ د برېښنا انرژۍ د پراختيا پروژو شاهدان يو.
له بل لوري د رياست الوزرا اقتصادي مرستيال ملا عبدالغني برادر ويلي، افغانستان له کلونو راهيسې پر وارداتي برېښنا تکيه کوي، چې په مقابل کې يې په زياته اندازه پېسې ورکوي؛ له يوه اړخه دا برېښنا په لوړ قېمت تمامېږي او له بل اړخه په اوږد مهال کې دا چاره ډاډمنه او ګټوره نه ده، د نوموړي په وينا سرپرست حکومت په کور دننه د هېواد د برېښنا د اړتيا پوره کولو ته ژمن دی.
د مسؤولینو په وینا، د دغې پروژې په بشپړېدو سره به د هرات د صنعتکارانو د برېښنا ستونزه حل شي.