د ټولگټو وزارت وايي، په هلمند کې د گرشک ولسوالۍ ـ سنگیلان سیمې پورې د ۹۶ کیلومتره سړک د ترمیم او بیارغونې کار چې د ۳۹ پایو پلچکونو د ترمیم کار هم پکې شامل دی، چارې په چټکۍ سره روانې دي.
له یاد وزارت څخه په خپره شوې خبرپاڼه کې ویل شوي، د سړکونو په ترمیم او پلچکونو په جوړولو ۵۰ مېلیونه افغانۍ لگښت راځي.: «دغه راز د یاد ولایت اړوند د نهرسراج ولسوالۍ – هلمند کندهار دوه لارې د ۲۳ کلیومتره سړک او ۲۴ پایو پلچکونو د ترمیم او بیا رغونې کار د ټولگټو وزارت لخوا د ۱۸۰۲۵۸۵۰ افغانیو په ارزښت د یو سړک جوړونې او ودانیز شرکت سره قرار داد شوی چې دا مهال یې چارې په چټکۍ سره روانې دي.»
د خبرپاڼې له مخې، د کندهار هلمند دوه لارې – گرشک ولسوالۍ اول سکشن ۲۴ کیلومتره سړک او ۶ پایو پلچکونو د ترمیم او بیا رغونې کار د ۲۲۷۰۴۴۲۲ افغانیو په ارزښت بشپړ شوی دی.
د یاد وزارت د معلوماتو پر بنسټ، د دغو پروژو د کار پر مهال د سیمې یو شمېر اوسېدونکو ته د کار زمینه هم برابره شوې او په بشپړېدو سره به یې د خلکو گڼې ترانسپورتي ستونزې هوارې شي.