د هلمند د کرنې، اوبو لګولو او مالدارۍ ریاست په يوه خپره شوې خبر پاڼه کې وايي، چې د دې ریاست په هلو ځلو په مرکز لښکرګاه کې د کرنې ریاست اړوند ملکیت کې د خصوصي سکټور له لوري د شااو خوا ٤٢ میلیونه افغانیو په لګښت د شیدو د پروسس یوه پخوانۍ فابریکه بیا رغول کېږي.
د ياد رياست له لوري د خپرې شوې خبر پاڼې د معلوماتو له مخې، د هلمند د کرنې اوبو لګولو او مالدارۍ رئیس مولوي نیازمحمد وهاج ویلي، یادې فابریکې د ظاهر شاه د واکمنۍ پر وخت فعالیت کولو او هره ورځ به یي ٤٠ متریک ټنه شیدې پروسس کولې او بیا به د لبني محصولاتو په ډول د هلمند په ګډون یو شمېر نورو ولایتونو ته د خرڅلاو په موخه لېږدولې، چې وروسته له ډېرې مودې له کاره لوېدلي بېرته فعالېږي.
د يادونې وړ ده چې په هېواد کې په وروستيو درې کلونو کې بې شمېره لویې او وړې له کاره لوېدلې فابريکې بیا فعاله او په توليد یې پيل کړی، چې د اقتصادي چارو د پوهانو په وينا د هېواد په اقتصادي وده کې به مهم رول ولوبوي.