د هلمند د کرنې، اوبولگولو او مالدارۍ ریاست وايي، د مرکز لښکرگاه د بولان د نیالگیو روزنځای کې د پسې ۵زره اصلي نیالگیو د تولید په پار د تخمونو کرکېله پیل شوې ده.
له یاد ریاست څخه په خپره شوې خبرپاڼه کې ویل شوي، لومړی په پلاستیکي کڅوړو کې د پستې باکیفیته کرکېله کېږي، چې تخمونه به د مسلکي کارکوونکو له لوري سږکال تر روزنې لاندې نیول کېږي او راتلونکی کال ته به د نیالگیو وېشلو د کړنلارې مطابق وېشلو ته چمتو کېږي.
د هلمند د کرنې ریاست اړوند دطبیعي سرچينو امریت مسلکي کارکوونکو لخوا د نیالگیو په یاد روزنځای کې د بېلابېلو مېوه لرونکو نیالگیو ترڅنگ ډول ډول زینتي نیالگي تر روزنې لاندې دي، چې راتلونکي کال ته به ورڅخه زرگونه باکیفیته نیالگي د بڼوالو لپاره چمتو شي.
تېره اوونۍ د هلمند د کرنې ریاست ویلي وو، چې په دغه ولایت کې د خورماوو د کرکېلې هڅې هم روانې دي او په پام کې لري چې په هلمند کې د خورماوو بڼونه جوړ کړي.