د هندوستان انډين ايکسپرېس ورځپاڼې په يوه راپور کې د افغانستان او هند ترمنځ وروستیو سوداګريزو اړيکو ته کتنه کړې او د هند د سوداګرۍ وزارت له قوله یې خبر ورکړی چې دغه هېواد ته د افغانستان صادرات تر ټولو لوړې کچې ته رسېدلي خو واردات بيا برعکس تر ټولو ټيټې کچې ته راغلي دي.
د هندوستان د سوداګرۍ وزارت د معلوماتو له مخې، په ۲۰۲۳-۲۴ مالي کلونو کې له افغانستان څخه د هند واردات خپل تر ټولو لوړ حد یعنې «۶۴۲.۲۹ مېلیونه ډالرو» ته رسېدلي؛ خو د هند صادرات افغانستان ته په تېرو ۱۶ کلونو کې تر ټولو ټیټې کچې ته راښکته شوي دي.
ياده دې وي، چې د افغانستان او هند ترمنځ په دې وروستيو کې په سياسي، اقتصادي او سوداګريزو اړيکو کې په لوړه کچه مثبت بدلون راغلی او په دې سربېره تمه کېږي، چې ډېر ژر به په نوي ډهلي کې د افغانستان سفارت سرپرست حکومت ته وسپارل شي.