د هرات د سوداګرۍ او کانونو خونې په وينا د هرات په صنعتي ښارګوټي کې د لس میلیونه ډالرو په لګښت د ورقو او کارتن جوړولو یوې معیاري فابریکې په فعالیت پیل وکړ.
د یادې فابریکې د پرانیستې په مراسمو کې د هرات مرستیال والي مولوي مهاجر فراهي د صنعتي پرمختګ ستاینه کړې او ویلې یې دي چې د افغانستان راتلونکی د صنعتي او صادراتي هېواد په توګه روښانه دی.
نوموړي زیاته کړې، چې هغوی د صنعتکارانو او پانګوالو سره په هره برخه کې لازمه همکاري کوي او د اقتصاد ودې او د کاري فرصتونو ډېرولو لپاره لازمې اسانتیاوې برابروي.
په ورته وخت کې د هرات د صنایعو او کانونو خونې رییس حمیدالله خادم وویل، چې د ورقو او کارتن جوړولو په دغه فابریکه کې ۱۰ میلیونه ډالره پانګونه شوې چې په ساعت کې به د ۲۰ زره متره په اندازه ورقې او کارتنونه تولیدوي.
په دغه فابریکه کې لسګونو هېوادوالو ته د کار کولو زمینه هم برابره شوې ده.