الجزيرې ټلويزيون راپور ورکړی، چې اروپايي هېوادونو د اوکراین د امنیت لپاره د امريکايي ځواکونو غوښتونکي دي، خو امریکا یې په ځواب کې «نه» ويلي او په خبره یې يواځې کولای شي د هوا له لارې ملاتړ وکړي.
سرچينه زياتوي، چې ډونالډ ټرمپ د همدې موضوع په اړه د فاکس اینډ فرینډز پروګرام کې ويلي «موږ چمتو یو چې له اوکراین سره په ډېرو شیانو کې مرسته وکړو، لکه د هوا له لارې مرستې، ځکه کوم څه چې موږ لرو هغه هېڅوک نه لري.»
بلخوا د سپینې ماڼۍ وياندې کارولین لیویټ هم په ټینګار سره ويلي، چې امریکایي سرتیري به د مسکو او کییف ترمنځ د سولې په هیڅ تړون کې برخه وانخلي او په خبره یې کېدای شي امريکا د امنیت تضمین لپاره نورې لارې چمتو کړي.
ياده دې وي، چې د اوکراين او روسيې جګړې له پيل راهيسې اوکراين او اروپا هيله لري چې امريکايي سرتېري د اوکراين په ځمکنۍ جګړه کې برخه واخلي.