اې بي سي نیوز راپور ورکړی، چې د امریکا ولسمشر ډونالډ ټرمپ ویلي، هغه کسان چې په ملګرو ملتونو کې د برقي زینو د خرابېدو لامل شوي، باید ونیول شي.
سرچينې ويلي، ټرمپ د ملګرو ملتونو په سازمان کې د برقي زینو د خرابېدو او د وینا پرمهال د غږ د نه اورېدو په تړاو په یوه پوسټ کې لیکلي «دا پېښه تصادفي نه وه، دا په ملګرو ملتونو کې درې اړخیزه خرابکاري وه. هغوی باید وشرمېږي.»
ټرمپ په ټولنیزه شبکه «ټروټ سوشل» کې دا مسله «یوه ریښتینې رسوایي» وبلله او زیاته یې کړه، چې نوموړي د ملګرو ملتونو سرمنشي ته په یوه لیک کې لیکلي، چې د دې موضوع په اړه د سمدستي څېړنو غوښتنه کوي.
ياده دې وي، چې تېره سه شنبه ورځ د ملګرو ملتونو غونډې ته د ډونالډ ټرمپ د وينا پر مهال مايک خراب او ګډونوالو د هغه غږ نه اورېده؛ له دې پېښې وروسته له ودانۍ څخه د هغه د وتلو پر مهال برقي زينه هم خرابه او له کاره لویدلې وه.