ټولګټو چارو وزارت وايي چې د روان کال د جدي مياشتې له پيله تر پايه د ټولګټو وزارت د اوسپنې پټلۍ د حيرتان، تورغونډۍ، اقينې او خواف هرات بندرونو له لارې (۴۰۸۸۷۶) مټریک ټنه انتقالات شوي دي.
د ټولګټو چارو وزارت د خبرپاڼې په بنسټ د حیرتان بندر له لارې (۳۰۲۳۲۷) ټنه، د آقینې بندر له لارې(۲۷۰۴۵) ټنه، د تورغونډۍ بندر له لارې (۷۰۵۶۴) ټنه او د خواف-هرات له لارې (۸۹۴۰) ټنه، چې ټولټال (۴۰۸۸۷۶) ټنه نفتي، غیر نفتي او نور مواد دي، هېواد ته وارد او صادر شوي دي.
ټولګټو چارو وزارت دغه راز زياتوي چې د انتقالاتو له ډلې یوه برخه ټرانزيټ او صادرات دي، او په جدي مياشت کې (۱۶۹۸) ټنه ټرانزیټ او صادرات شوي، چې لویه برخه یې وچه مېوه، کينو، وريجې او د انارو جوس جوړوي.
دا په داسې حال کې ده، چې د افغانستان د اوسپنې پټلۍ له لارې په تېرو ۹ مياشتو کې شاوخوا ۳.۲ ميليون مټريک ټنه انتقالات ترسره شوي دي.