د ټولگټو وزارت وايي، د دغه وزارت چارسمبالي وزیر ملا محمد عیسیٰ ثاني د حیرتان ـ مزار شریف د اوسپنې پټلۍ چارې له نږدې لیدلي دي.
له یاد وزارت څخه په خپره شوې خبرپاڼه کې ویل شوي، د حیرتان ـ مزارشریف د اوسپنې پټلۍ مسیر له (لومړي، دویم، درېیم، څلورم او پينځم) سټېشنونو او پورټونو او د ياد مسير د ترمیماتي چارې روانې دي.
په خبرپاڼه کې ویل شوي، د حیرتان ـ مزار شریف د اوسپنې پټلۍ مسوولینو ته لارښوونه شوې، چې ژر تر ژره باید د یادې پروژې ترمیماتي چارې بشپرې کړي، تر څو د سوداگریزو توکو لېږد را لېږد او اوسپنې پټلۍ د مزار شریف تر ښار (څلورم او پينځم) پورټ پورې را ورسېږي.:«د دغه سفر پر مهال د ټولگټو وزیر د بلخ د عوایدو امریت څخه هم لیدنه کړې او مسوولینو ته یې د عوایدو په برخه کې د روڼتیا لارښوونه کړې.»
د یادونې وړ ده، چې د حیرتان ـ مزار شریف اصلي او فرعي اوسپنیزه کرښه له صفري نقطې څخه تر پينځم پورټ پورې ټولټال ۱۰۶ کیلومتره اوږدوالی لري، چې ازبېکستان د اوسپنې پټلۍ له لارې بلخ سره نښلول کېږي.
اوسمهال د سوداگریزو توکو د لېږد را لېږد د پاکولو او بارولو بهیر یوازې په حیرتان بندر کې کېږي، چې د یادې ترمیماتي پروژې په بشپړېدو سره به د اوسپنې پټلۍ د توکو لېږد د مزار شریف ښار دننه په څلورم او پینځم پورټ هم پیل شي.
د ټولگټو وزارت د معلوماتو له مخې، هڅه کوي چې د لویو لارو، سړکونو او اوسپنیزې کرښې په ترمیم او بیارغونې سره هېوادوالو او سوداگرو ته گڼې اسانتیاوې برابرې کړي.افغانستان اوسمهال له ایران، ازبېکستان او ترکمنستان سره اوسپنیزه کرښه لري او له همدې لارو هره ورځ زرگونه ټنه سوداگریز توکي صادر او واردېږي.