د ټولگټو وزارت وايي، د وروستیو ورښتونو او سېلابونو له امله په پنجشېر، نورستان او کونړ ولایتونو کې ځینې سړکونه او لویې لارې زیانمنې شوې وې، چې اوس یې د پاکولو چارې پیل شوې دي.
له یاد وزارت څخه په خپره شوې خبرباڼه کې ویل شوي، د یادو ولایتونو لویې د ترافیکو پرمخ پرانیستل شوي دي.: «د پنجشير، کونړ او نورستان ولايتونو د ټولگټو رياستونو لخوا د ځينو نورو ادارو سره په همکارۍ او همږغۍ د اړوند ماشينرۍ او پرسونل په مټ د وروستيو سېلابونو راوتلو له امله د سړکونو د زيانمن شوو برخو د پاکولو چارې تر سره شوي او دامهال د ترافيکو پرمخ پرانيستل شوي دي.»
د خبرپاڼې له مخې، د پنجشېر په شتل او عنابه ولسوالیو په ځینو برخو کې د ورستیو تېزو ورښتونو له امله سېلابونه راوتلي وو، چې د يادو ولسواليو په ځينو نښلونکو مسيرونو کې رسوبي مواد د سړکونو سطحې ته راپورته شوي او د موټرونو تگ-راتگ يې د ستونزو سره مخ کړی وو.
همدارنگه د کونړ اړوند د کونړ ـ نورستان عمومي سړک د قمچې په سیمه کې د تېز ورښت او سېلاب له امله تخریب شوی و، چې د ترافیکو پرمخ یې عمومي لاره بندې کړې وه.: «دغه راز د نورستان اړوند د واما ولسوالۍ د کلیگل سيمې په پينځو برخو کې هم سړک د وروستيو ورښتونو او سېلابونو له امله په بشپړ ډول تخریب شوی، چې عمومي لاره د ترافیکو پر مخ تړل شوې او د پاکولو چارې يې په چټکۍ سره روانې دي.»
په خبرپاڼه کې ویل شوي، د ترانسپورت وزارت هڅه کوي چې د خپل تخنیکي او مسلکي پرسونل په مټ د هېواد د لویو لارو او سړکونو په ترمیم، رغونه او بیارغونې سره خلکو ته ترانسپورتي اسانتیاوې برابرې کړي.