د پاکستان پوځي رژیم تر کنټرول لاندې رسنیو راپور ورکړی، چې د اسلاماباد یوې محکمې د یاد رژیم پنځو منتقدینو ته د «ډیجیټلي ترهګرۍ» په تور دوه ـ دوه ځله د عمر قید سزاء اورولې ده.
د راپور له مخې محکمې دغه پرېکړه د عادل راجا، صابر شاکر، وجاهت سعید، معید پیرزاده او حیدر مهدي په حق کې د هغوی په نشتون کې کړې ده.
محکمې پر دې سربېره د پاکستاني رژیم یادو سرسختو منتقدینو ته ۱۵-۱۵ لکه پاکستانۍ روپۍ جریمه هم ټاکلې ده.
هېره دې نه وي، چې یاد رژیم د خپلو مخالفینو پر ضد تر دې وړاندې هم ورته اقدامات کړي دي.
د پاکستاني رژیم یوې محکمې څو ورځې وړاندې د یاد هېواد د حاکم ګوند او رژیم تر ټولو لوی منتقد، عمران خان هم پر ۱۷ کلن بند محکوم کړی و.