له پښتونخوا څخه د هندوکش غږ سرچينې وايي چې پاکستاني طالبانو پرون ورځ په بېلابېلو بريدونو کې حکومتي پوځيانو ته درنه مرګ ژوبله اړولې او يو لوړ پوړی افسر یې ژوندی نیولی.
د معلوماتو له مخې پاکستاني طالبانو په يوه بريد کې د خیبر پښتونخوا د بنو ولسوالۍ ښار ته څېرمه د سبزۍ منډۍ پوسته له منځه وړې، درې تنه پوليس یې وژلي او یو چینایي کلاشنکوف یې ترلاسه کړی دی.
له بل لوري بيا د پاکستاني طالبانو استخباراتي ادارې د خيبر پښتونخوا د شمالي وزیرستان په میرعلي ولسوالۍ کې د پاکستان حکومت د نشهيي توکو پر ضد د مبارزې ادارې يو لوړ پوړی افسر محمد حنیف نيولی او نامعلوم ځای ته یې له ځان سره بېولی دی.
دغه راز بيا په دېره اسماعيل خان کې پوځيانو او ځايي اربکيانو د پاکستاني طالبانو يوه ګروپ ته کمين نيولی چې په پايله کې یې د پاکستاني طالبانو يوه غړي خپل ژوند له لاسه ورکړی، د سرچینې په وینا، په یاده جګړه کې پوځيانو ته هم درنه مرګژوبله اوښتې ده.