د پاکستاني طالبانو غورځنګ اړوند عمر ميډيا د خپل مياشتني راپور په خپرولو سره ویلي، چې ځواکونو یې له ۲۰۱۳ کال وروسته د روان میلادي کال په «مې» میاشت کې د خیبر پښتونخوا او پاکستان په بېلابېلو سیمو کې د پاکستان حکومت پر امنيتي ادارو او کارکوونکو تر ټولو ډېر ۳۱۵ بریدونه کړي، چې په ترڅ کې یې ۳۵۵ کسان وژل شوي او ټپيان دي.
د خپرو کړيو معلوماتو له مخې، په دغو بریدونو کې د پاکستان د بېلابېلو امنیتي ادارو ۱۵۵ تنه وژل شوي، ۲۰۰ تنه ټپيان او ۱۱ تنه نور ژوندي نیول شوي، چې پکې پوځیان، پولیس، ملېشې او ځایي اربکیان شامل دي.
سرچينې همدا راز ويلي، چې په دې موده کې تر ټولو ډېر ۷۶ بريدونه په شمالي وزيرستان، ۶۴ په جنوبي وزیرستان، ۴۳ په خيبر، ۲۹ په دېره اسماعيل خان، ۲۲ په بنو، ۲۰ په ټانک او همداسې لسګونه نور په بېلابېلو ولايتونو کې ترسره شوي دي.
د پاکستاني طالبانو غورځنګ ویلي، چې په بريدونو کې یې تر ټولو ډېر ۱۲۶ درازکوف يا لیزري، ۱۰۴ چریکي، ۳۵ کمینونه او ۱۹ ځوابي بریدونه شامل دي.
په خپرو شويو معلوماتو کې راغلي چې پاکستاني طالبانو د دې يوې مياشت عملیاتو په ترڅ کې د پاکستاني ځواکونو ۶۳ څارونکې کېمرې، ۴۲ عرادې پوځي وسایط، ۸ عدده ډرون کیمرې، ۶ نظامي ودانۍ، ۳ عرادې زغروال موټر، يو ټانګ، د لمریزې برېښنا او اوبو شبکې تخریب کړي دي.
پاکستاني طالبانو همدا راز په دې بريدونو کې ۱۵ ميله بېلابېل ټوپکونه، درې حرارتي ترمل او درې شپني دوربينونه، يو ميل M4 ټوپک، يوه قبضه راکټ لانچر، يوه ډرون کېمره، يو عراده موټر، موټرسايکل او ګڼ شمېر نور مهمات هم ترلاسه کړي دي.