درېیمه برخه
د پاکستان جنایتکاره پوځ چې اوس د خپل ولس له بې سارې مبارزې او غاښ ماتوونکي ځواب سره مخ دی، پښې یې ور لړوزولې دي، هڅه کوي چې خپله ماته په نورو مسایلو پټه کړي، د خلکو او نړۍ پام بلې خواته واړوي، نو ځکه د خپلو جنایتونو او وحشتونو پړه پر افغانستان او نورو بهرنیو جهتونو ور اچوي. پاکستانی جنایتکاره او وحشي پوځ د خپلو دغو هڅو په لړ کې په افغانستان کې د دننه پر ماشومانو، مېرمنو، بوډاګانو، لوبغاړو او نورو ملکي کسانو او اهدافو وحشي بمباري او بریدونه کوي.
د پاکستان پوځ کټ مټ د امریکايي جنایتکاره پوځ په څېر او اشاره، چې مخکې به یې د افغانستان په کلیو او بانډو کې پر ملکیانو بمبارونه کول، په توپونو یې ویشتل او کورونه یې ورته ورانول، دا کارونه اوس دغه جنایتکاره او ظالم پوځ پیل کړي، دوی ته که څه هم څو ځله غاښ ماتوونکي ځوابونه ورکړل شوه، خو داسې ښکاري چې دا کرايي او وحشي پوځ له خپلو وحشتونو لاس نه اخلي او خپلې ماتې دومره وارخطا او لالهانده کړي چې هرې خواته لاس اچوي.
د پاکستاني پوځ دغه جنایتونه به د پاکستاني کرايي پوځ او ملېشو عمر نور هم لنډ او سیمه به د دوی له جنایتونو څخه خلاصه کړي. د پاکستاني جنایتکاره پوځ او هلته یوې خاصې مفسدې او پر غرب متکي کړۍ له کبله هم پاکستانی ولس په سخت عذاب کې دی، هم یې سیمه له ننګونو سره مخ کړې او هم یې ډېر فرصتونه ترې اخیستي دي، نو د دغه قاتل پوځ مخه نیول او د عدالت میز ته یې را کشول د ټولو ګډ او مهم مسؤلیت دی.