د پاکستاني رسنيو د راپورونو له مخې د دغه هېواد د بهرنيو چارو وزارت د جنورۍ په لومړۍ نېټه ويلي، چې د ۲۰۰۸ کال د هوکړهلیک پر دوام یې د خپلو زندانیانو نوملړ هند ته سپارلی دی او د دغه تړون له مخې، دواړه هېوادونه اړ دي چې د هر کال د جنورۍ او د جولای په لومړیو نیټو د یو بل په زندانونو کې د بندیانو لستونه تبادله کړي.
راپورونه زياتوي چې د پاکستان حکومت په اسلام اباد کې د هند سفارت ته په پاکستان کې د ۴۹ ملکي وګړو او ۲۱۷ کب نیوونکو په ګډون د ۲۶۶ هندي بندیانو نوملړ سپارلی او همداراز له هنده یې غوښتي ټول هغه پاکستانیان خوشې او بېرته راستانه کړي، چې په دغه هېواد کې یې خپله جزا بشپړه کړې ده.
په ورته وخت کې، د هند حکومت په نوي ډیلي کې د پاکستان سفارت ته د هند په زندانونو کې د ۴۶۲ پاکستانيان بنديانو نوملړ ورکړی دی، اود دغه نوملړ له مخې په ۴۶۲ بندیانو کې ۳۸۱ ملکي وګړي او ۸۱ يې کب نیوونکي دي.
همدا راز بيا د پاکستان د بهرنيو چارو وزارت ویلي، د هند په زندانونو کې ۵۲ ملکي بندیانو او ۵۶ کب نیوونکو خپل بند بشپړ کړی او له هنده یې غوښتي چې یاد کسان خوشې او دې هېواد ته ستانه کړي.