د بلوچستان د “هرنایي” ولسوالۍ له “زرغون” نومي سیمې د تښتول شویو لسو تنو لومړني مالومات خپاره شوي، چې ویل کیږي دوه یې د پنجاب، شپږ یې د بلوچستان اوسېدونکي دي او همداراز یو پښتون او یو بل هم بلوڅ دی.
په کوټه کې د کورنیو چارو وزارت یو چارواکي رسنیو ته ویلي، چې په تښتول شویو کسانو کې د ګمرک یو مسول هم شامل دی.یاد اشخاص تېره چهار شنبه هغه مهال وتښتول شول، چې د کوټې “هرنایي زرغون غر” سیمې ته په چکر تللي وو.
یاد کسان د پنجشنبې په ورځ په نښه شوي او له سیمې کوم نامالوم ځای ته تښتول شوي دي.
د رپوټونو پر بنسټ وسله والو دا کسان د پېژندپاڼو له کتلو وروسته له ځان سره یوړل.
بل لور ته د بلوڅانو ازادۍ غوښتوونکو پوځ ویلي، چې ټول لس تنه یرغمل شوي کسان دوی تښتولي دي.
بل لور ته د پاکستان حکومت په مرکزي پنجاب ایالت کې د ناامنیو مخنيوي په موخه پر لویو غونډو، لاریونونو او اعتراضونو بندیز اعلان کړی دی.
د پنجاب د کورنیو چارو ایالاتي وزارت د یوې اعلامیې په خپرولو سره وویل: “په ټول پنجاب کې د قانون د ۱۴۴مې مادې پر بنسټ په ناستو، هر ډول غونډو، لاریونونو او جلسو بندیز لګېدلی دی.
“د حکومت له خوا په خپره کړې اعلامیه کې راغلي، چې دا ګام د امنیتي دلایلو له کبله اخېستل شوی دی او په وینا یې ولسي غونډې د وسله والو له خوا په اسانه هدف ګرځېدلی شي.
په اعلامیه کې دا هم راغلي، چې په ټول پنجاب کې به د ناامنیو ممکنه پېښو مخنېوي په موخه په لویو ناستو اعلان شوی بندیز تر اووه ورځو (۲۷م جون) پورې وي.
اخوا بیا د پاکستان په پارلمان کې د اپوزیسیون مشر عمر ایوب دا پرېکړه غندلې او دا یې د خپلواکۍ پر ضد حکومتي ګام بللی دی.
د تحریک انصاف دغه مشر پارلمان ته د وینا پر مهال دا “د ولسواکۍ ضد” عمل بللی دی.