ټيليګراف ورځپاڼې په يوه راپور کې ليکلي، وروسته له هغې چې افغان حکومت په افغانستان کې د کوکنارو کر او د نشه يي توکو توليد بند کړ، د ګوګل او سپوږمکۍ انځورونه ښيي چې اوس په پاکستان کې د کوکنارو کر د پام وړ زيات شوی او دغه هېواد د کوکنارو د کښت پر مرکز بدلېدونکی دی.
ورځپاڼې همدا راز د پاکستان د ځايي خلکو له قوله ويلي، چې د پاکستان ډېری چارواکي پر دې موضوع سترګې پټوي او د دوی په شراکت کې د نشه يي توکو کاروبار ورځ تر بلې پراخېږي.
سرچينې همدا راز ويلي، چې اوس مهال، کوکنار د پاکستان د نارامه بلوچستان ایالت په زرګونه هټکاره ځمکه باندې کرل شوي دي.
ياده دې وي، چې واک ته د افغان حکومت له رسېدو راوروسته په تېرو څه باندې څلورو کلونو کې د نشه يي توکو د کښت، کاروبار او قاچاق مخنيوي سربېره په نشه یي توکو د روږدو سلګونه زره خلکو درملنه هم شوې ده.