د پاکستان یو شمېر رسنیو راپورونه خپاره کړي، چې د IMF یو پلاوی د پاکستان د اقتصادي وضعیت د څېړنې او د دې هېواد خزانې وزارت ته د نورو پورونو د ورکړې په اړه دغه هېواد ته سفر کوي.
“نیو نیوز” په نوم یوې پاکستانۍ رسنۍ ویلي، چې د IMF یاد پلاوی به سبا د پاکستان د خزانې وزارت له چارواکو سره د دویمې ورځې مذاکرات پیل کړي، چې ټاکل شوې ده، دغه خبرې به د مارچ تر ۱۸ مې پورې دوام وکړي.
یادې رسنۍ زیاته کړې، که د دغه هېواد چارواکو له لوري د IMF له پلاوي سره دغه خبرې بریالۍ شي، نو پاکستان به په لومړي قسط کې د پیسو له نړۍوال صندوق څخه نور “یو میلیارد” او “۱۰ میلیونه” امریکایي ډالر پور ترلاسه کړي.
د پاکستان مرکزي بانک څه موده وړاندې په یوې خپره کړې خبرپاڼه کې ویلي و، چې اوس مهال په پاکستان د نړۍوالو پورونه “۶۵ زره میلیارده” پاکستانیو کالدارو ته رسیږي، چې نږدې “۲۳۳ میلیارده” ډالره کیږي.
په وروستیو څو کالونو کې د پاکستان اقتصادي وضعیت دومره خراب شو، چې ان په ځینو هېوادونو کې یې د سفارتونو ودانۍ وپلورلې.
د ځینو رسنیو د راپورونو په حواله ویل کېږي، چې پاکستان دا مهال په میلیاردونه امریکایي ډالره پوروړی دی، وړاندې یې هم د پورونو غوښتنې کړې وې، خو چا ورته مثبت ځواب او د پورو ورکولو سینه ونه ډبوله.