پاکستان کې د افغانستان پخوانی سفير او د سياسي چارو شنونکي مولوي عبدالسلام ضعیف د افغانستان او پاکستان ترمنځ روان کړکېچونه، شخړې او د پوځي نښتو اصلي لامل د پاکستان پوځ مستبدې او مداخلتي پالیسۍ بللې دي.
ښاغلي ضعیف ویلي، چې د افغانستان او پاکستان د شخړې جرړه د اسلاماباد د غلطو تګلارو، د نفوذ د هڅو او بېځایه غرور پایله ده او په خبره یې افغانان د چا دښمن نه دي او نه د جګړې مینه وال.
هغه ټينګار کړی «پاکستان باید خپل زاړه فکرونه پرېږدي، د افغانستان خپلواک حاکمیت، ارضي تمامیت او د افغان ولس عزت ته باید درناوی وکړي. افغانستان هېڅکله د بل هېواد تابع نه دی او نه به شي. موږ له چا سره دښمني نه لرو، خو د هر ډول تجاوز او سپکاوي پر وړاندې د دفاع حق لرو.»
نوموړي همدا راز د پاکستان پر دولت او پوځ سختې نيوکې کړي او ویلې یې دي، چې اسلاماباد افغانستان د خپل نفوذ د سیمې برخه ګڼي او نه غواړي چې کابل له نړۍ سره په خپلواکه توګه اړیکې ولري، حال دا چې پاکستان نه اقتصادي، نه نظامي او نه تاریخي ځواک لري چې د یو ملت برخلیک وټاکي.
مولوي عبدالسلام ضعيف زیاته کړې، چې پاکستان په پرلهپسې توګه په افغانستان کې لاسوهنه کوي، د افغانستان د اقتصاد او صادراتو مخه نیسي، د افغان مېوو د ټرانزیټ پر مهال ستونزې جوړوي، د افغان په خاوره تېری کوي او د ملګرو ملتونو په غونډو کې د افغانستان ناسم استازیتوب کوي.
نوموړی وايي، «پاکستان افغانستان ته په سپک نظر ګوري؛ افغانان توهینوي، بندیانوي، او آن نورو هېوادونو ته یې سپاري، د ناټو او امریکا لپاره یې پوځي هډې ورکړې، او هغوی د افغان وژنې لپاره د دوی خاوره استعمال کړه، چې دا کړنې نه د ورورۍ دي، نه د اسلام او نه د انسانیت.»
ښاغلي ضعیف په روان وضعيت کې پاکستان ته د حل لارو وړاندې کولو په شکل ويلي، چې که پاکستان غواړي چې له افغانستان سره ښې اړیکې ولري، باید په خپلو غلطو ستراتیژیو تجدید نظر وکړي، د امپراتورۍ خوبونه پرېږدي او د متقابل درناوي تګلاره غوره کړي.