ليکوال: عبدالله زاهد
پخواني شړل شوي د سياسيونو په نامه غله او خاينان نن يو ځل بيا د اتريش په ويانا کې سره راټول شوي ترڅو د افغانانو په وينو د تجارت لاره بيا پرانېزي؛ خپلو بادارانو ته زارۍ کوي چې راځئ په ګډه د افغان ولس وينه و زبېښو.
له کوم وخت څخه چې افغانستان آزاد شوی او واک طالبانو ته رسېدلی؛ په افغانستان کې د امن، خوشحالۍ او خپلواکۍ احساس هر افغان ته بې حده خوښي بښي او هېڅ افغان نه غواړي چې بيا ځلي دې افغانستان د پرديو جګړو په سنګر بدل او د پرديو دسيسې دې دلته عملي شي؛ ځکه په يوه اتحاد سره د افغانستان د اسلامي امارت تر شاه ولاړ دي.
افغان ولس دغه پخواني غله و شرموښان ښه پېژندلي چې څنګه يې د افغانانو په وينه تجارت کاوه او څنګه يې د پرديو دسيسې دلته په افغانستان کې عملي کولې؟ خو بيا هم دغه غله نه په قراره کېږي او له افغانستان څخه بهر په يوه و بل نامه غونډې جوړوي او هغه هم په داسي يوه حالت کې چې نه يې په داخل د افغانستان کې څوک پر خبره غوږ نيسي او نه يې هم هغه مات شوي باداران پر خبره غوږ نيسي؛ ځکه باداران يې ښه پوهېږي چې افغان ولس ټول د افغانستان د اسلامي امارت سره ولاړ دی، دا ځکه چې طالبانو افغان ولس د اسلامي نظام، آزادۍ، سرتاسري امن، عدل، پرمختګ او يووالي په تحفه سره نازولي دي.
نړۍوال هم ښه پوهېږي چې د طالب په شتون کې په هېڅ صورت دوی بريالي کېدلای نه شي، نه هم د جګړې او نه هم د سياست په ډګر کې؛ دغه وجه ده چې دغه تښتېدلي غله او خاينان هر څه ورته و ژاړي خو بهرنيان پرې هېڅ غوږ نه نيسي.
بل طرف ولس هم اوس د هغوی په خبرو نه غولېږي؛ ځکه ښه پوهېږي چې د دغو خاينانو په وينا او کردار کې بلها فرق شته؛ افغان ولس ښه پوهېږي چې دغه په ويانا کې راټول شوي سياسيون نه، بلکې همغه وحشيان، غله، لنډغر او خاينان دي چې د بهرنيانو پر ټانک سپاره راغلي وو، شل کاله يې د دې ولس په سرونو لوبې وکړې، د دې ولس په وينو يې تجارت وکړ چې اوس يې هم لاسونه د افغان ولس په وينو ککړ دي؛ کوم چې د بهرنيانو سره يو ځای بيرته له هېواده و تښتېدل.
ولس ښه پوهېږي چې دغه په ويانا کې راټول شوي خاينان همغه سياسيون دي چې د تعصب په تخم شيندلو سره يې ولس يو د بل په مقابل کې درولی وو، چا به افغانيت نه مانه، چا به اسلاميت نه مانه، چا به د افغانستان جغرافيه نه منلو زمزمې کولې، خو د دوی د غرور زمزمې هله په ځګېروي بدلې شوې چې بهرنيانو ترې لاس واخيست او و تښتېدل؛ دا چې نن يې جېبونه تش شوي ځکه غواړي بيا ځلي د افغان په وينو تجارت ته لاره هواره کړي.
افغان ولس نن سبا يو او بل ولايت ته د امن په فضا کې سفرونه کوي، يو له بل سره مجلسونه کوي، يو او بل يې درک کړی چې ټول ولس مينه ناکه دی بس څو غله مو پر سر مشران وو چې خرڅ کړي يې وو.
افغان ولس د افغانستان اسلامي امارت ته لاس په دعاء دي، وايي چې موږ خطا ايستل شوي وو؛ د پښتون، تاجک، ازبک او نورو نومونو باندي یې د خپلو افغانانو مخالفين جوړ شوي وو، خو اوس الحمدلله چې د اسلامي امارت په راتګ سره ټول يو ولس شوو، اوس برتري يواځې په تقوا کې ده نه په پښتون، تاجک، هزاره او قومپرستۍ، د ژبې او سيمې په تعصب کې چې بل طرف د دغو غلو (شمالي ټلواله) کردار او سياست پر همدې تعصب باندي ولاړ دی.
په ويانا کې راټول شوي غله همغه ناولې څېرې دي چې څوک د افغانستان له جغرافيې منکره، څوک له افغانيت، چا بيا پښتون افغان نه باله، چا تاجک مهاجر باله، تر څو په دغو شعارونو سره دوی ځانونه خپل شوم هدف ته رسولي وو؛ خو نن بيا را ولاړېږي د متحد افغانستان په نامه غونډه ويانا کې جوړوي او بهرنيانو ته زارۍ کوي چې موږ واک ته و رسوئ؛ تاسو سيمه کې خپلې دسيسې عملي کړئ خو بهرنيان هم داسي وېرېدلي چې په خپل ژوند به بيا داسي غلطي ونه کړي.
دغه په د اتريش ويانا کې راټول شوي شرمېدلي غله هېڅ نه شرمېږي؛ د طالبانو له راتګ سره د افغانستان د اسلامي امارت د مخالفت نغارې ډنګوي، خو تر اوسه دوی په خپلو منځنو کې هېڅ يوې ګډې اعلاميې ته لا هم نه دي رسېدلي؛ دا ځکه دوی د ولس د سرونو پر سودا نه سره جوړېږي چې څوک به څومره پيسې او څومره واک لري.
له بهره د مخالفت زمزمې د هغه چا مخالفت کې کوي چې د همدې نظام لپاره يې کلونه قربانۍ ورکړي، پر ځانونو يې بمونه تړلي او لا هم اماده ناست دي چې د اسلام او وطن لپاره ځانونه قربان کړي، خو دوی يې د مخالفت نارې له بهره را وهي او غواړي د افغان ولس ځوانان وغولوي.
په ويانا کې راټول شوي غله همغه لنډغر دي، ولسه! په شعارونو يې مه تيروځئ، ځکه د دوی په حلق کې توره ژبه خوږه لکه ګبين ده، اما په کردار کې همغه لنډغر دي، غله و خاينان دي، لا يې تر اوسه لاسونه د افغان په وينو سره او همغه شرموښان او د پرديو غلامان دي.