پر غزې بمباري؛ ۱۰۷ ملکي وگړي یوازې په تېرو ۲۴ ساعتونو کې وژل شوي

د غزې روغتیايي مسوولین وايي، پر غزه د اسرائیلو بمباري لا هم روانه ده، چې په تېرو ۲۴ ساعتونو کې ۱۰۷ تنه وژل شوي او ۱۶۵ تنه نور ټپیان شوي دي.
د روغتیايي مسوولینو په خبره، د جمعې په ورځ هم د اسرائیلو د بمبارۍ له امله په ۲۴ ساعتونو کې ۱۱۲ تنه وژل شوي او ۱۴۸ نور ټپیان شوي وو.
د ۲۰۲۳ز کال د اکټوبر په اوومه حماس او اسرائیلو ترمنخ جگړه پیل شوې ده، چې تر دې دمه د غزې په تړانگه کې ۲۷زره ۲۳۸ فلسطیني ملکي وگړي وژل شوي، چې ۷۵ سلنه یې ښځې او ماشومان دي او همدارنگه ۶۶زره او ۴۵۲ تنه نور ټپیان شوي دي، چې ډېره برخه یې ښځې او ماشومان دي.
اسرائیلو تر دې مهاله خپل لوري ته د ۱۲۰۰ تنو د وژل کېدو پخلی کړی او د ۲۴۰ تنو نیول کېدل یې منلي دي.
تېره میاشت وال‌سټرېټ ژورنال ورځپاڼې خبر ورکړی و، چې پر غزې د اسرائیلو د بمبارۍ راهیسې تر دې مهاله ۷۰ سلنه کورونه ویجاړ شوي او یا په بشپړه توگه له منځه تللي دي.
اسرائیل هره ورځ پر غزه ړندې بمبارۍ کوي، چې تر دې مهاله یې زرگونه بمونه د غزې پر خلکو غورځولي دي.
پر غزه د اسرائیلو د بمبارۍ وروسته په سور سمندرګي کې حوثیان هم هغه بېړۍ په نښه کوي، چې د اسرائیلو سوداگریز توکي لېږدوي او یا هم اسرائیلو ته سوداگریز توکي راوړي.
حوثیانو ویلي، په سور سمندرگي کې به یې بریدونه تر هغه وخته روان وي، چې اسرائیلو پر غزې خپلې بمبارۍ نه وي درولې.
سور سمندرگی د نړۍ یوه سوداگریزه لاره ده؛ خو اوسمهال پکې د امریکا او اسرائیلو پرته د نورو هېوادونو بېړۍ ازاد تگ راتگ کوي او یوازې د یادو دوو هېوادونو سوداگریزې بېړۍ په نښه کېږي.
نن امریکايي او برېتانيي چارواکي ویلي، په سور سمندرگي کې به تر هغه وخته خپلې بمبارۍ روانې وساتي، چې حوثیان یې له پښو غورځولي نه وي.