پر ځان بساینه؛ ننگرهار کې د مالټو ۶۶۰۰ نیالگي کېنول کېږي

د ننگرهار د کانال شرکت مسوولین وايي، په دغه ولایت کې د نیالگیو کېنولو پسرلنی کمپاین پیل شوی، چې تر پایه به زرگونه بېلابېل نیالگي کېنول شي.د کانال شرکت رئی غلام‌الرحمن کظیم وايي، په سږني کمپاین کې د کانال پر ځمکه د مالټو ۶۶۰۰ نیالگي کېنول کېږي او د دې ترڅنگ زرگونه مېوه لرونکي، بې‌مېوې او زینتي ونې هم اېښودل کېږي.: « افغانستان یو کرنیز هېواد دی، زموږ ډېر هېوادوال په کرنه او مالدارۍ بوخت دي، نو اړینه ده چې بڼوالۍ او کرنیزو فعالیتونه ته لا زیاته پاملرنه وشي، په دې چاره کې هم د هېواد او هم د هېوادوالو خیر دی.»ښاغلي کظیم له هېوادوالو وغوښتل چې د نیالگیو کېنولو، روزنې او پالنه کې ورسره همکاري وکړي، تر څو هېواد د طبیعي پېښو او افتونو پر مهال خوندي او خپلو راتلونکو نسلونو ته مو یو زرغون ننگرهار په ډالۍ کې پرې اېښی وي.له بل لوري د کرنې او مالدارۍ وزارت وايي، سږ کال په ټول هېواد کې شااوخوا ۴۳زره مټریک ټنه د سټروسو مېوې(کینو، مالټه، نارنج او لیمو) راټول شوي دي.د یاد وزارت له لوري په خپره شوې خبرپاڼه کې ویل شوي، د دغو شمېرو له مخې، سږ کال یو زره او ۵۴ هکتاره ځمکه د کینو او مالټو بڼونه پوښلې وو، چې به دغو بڼونو څخه ۱۲ زره او ۳۶۱ مټریک ټنه کینو او مالټې تولید شوي، چې ډېری یې د ننګرهار، لغمان او کونړ په ولایتونو کې دي.همدارنګه سږ کال په ټول هېواد کې ۱۳۱۶ هکتاره ځمکه د نارنج بڼونه پوښلې وو، چې له دغو بڼونو څخه په ټول هېواد کې ۲۲ زره او ۹۰۸ مټریک ټنه نارنج تولید شوي، په ننګرهار ولایت کې د نارنجو بڼونه ډېر دي، همدارنګه په لغمان، کونړ او روزګان ولایتونو کې هم نارنج ښې پایلې لرلې.په ورته وخت کې په ننګرهار، لغمان، کونړ، روزګان، تخار او کندوز ولایتونو کې سږ کال د لیمو ښه حاصلات شوي، چې په ټولیزه توګه ۷۵۱ هکتاره ځمکه د لیمو بڼونه پوښلې ده، چې له دغو بڼونو څخه اووه زره او ۷۲۵ مټریک ټڼه لیمو تولید شوي.د سټروس مېوې چې کینو، مالټې، نارنج او لیمو پکې شاملې دي، تر ډېره په لغمان، کونړ او ننګرهار ولايتونو کې کرل کېږي.ننګرهار د هېواد يو له ختيځو ولايتونو څخه دى، چې هوا يې د سټروسو مېوو د کښت لپاره غوره ثابته شوې ده.