زما لپاره دا یوه لوبه ده! دوی ولې ډونالډ ټرمپ وژني؟ امریکا د سیاسیونو د کشمکش یو لوبغالی دی او د نړۍ له هر هېواد څخه دلته سیاسي تشدد خورا پیاوړی دی، دغه وحشي سیاسون د نړۍ د انسانانو پر مرګ/وژنو او د نړۍ د توازن په قالب کې د هېوادونو د ځای پر ځای کولو پر سر، یو او بل سره وداړل، ټرمپ د اوکراین د ولسمشر زلنسکي مخالف دی، او بل لوري ته د بایډن اداره د اوکراین د جګړې لامل او سپورټ کوونکې ده.
د ټرمپ پر غوږ دې کوچني ټپ، د تش په نامه اسلامي هېوادونو اصلي څهره نړۍ ته ور وپېژندله او دا یې د نړۍ مسلمانانو ته په ډاګه کړله چې دوی د چا په اشاره وړاندې ځي او چا یې په غاړه کې د غلامۍ هار ور اچولی دی.
هغه عربي هېوادونه چې د فلسطین په ګاونډ کې قرار لري، لکه: مصر، سعودي عرب، عراق، سوریه او داسې نور… په ټرمپ ترسره شوی برید یې په کلکو ټکو وغانده او په ګاونډ کې یې پر غزه روان بشري ناورین، د سترګو پر وړاندې ترسره کېږي، هغه نه ویني، اما د ټرمپ د غوږ په کوچني زخم یې د محکومیت غږ اوچت کړ او د ژر تر ژره روغتیا غوښتنه یې ورته وکړه.
د ټرمپ په غوږ راڅڅېدونکې وینې ټول عرب په شور او خوځښت راوستل او بلې خوا ته د اسلامي امت د وجود په یوه برخه (فلسطین) چې کوم درد تېرېږي، نو دوی ولې په حرکت نه راځي؟آیا دا د رسول الله ﷺ په ټاټوبي هستوګن خېټور، عیاش حکام د خان یونس په کوڅو کې پرتې وینې نه ویني؟ آیا د غزې د ښځو او ماشومانو چیغې یې نه تر غوږو کېږي؟ آیا په غزه کې ترسره کېدونکی جنایت، وحشت او تشدد ولې نه غندل کېږي؟!د ټولې نړۍ جګړې او ناورینونه له دغه خاورې (امریکا) څخه مستقیم او یا غیرې مستقیم اداره کېږي، د امریکا له خوا د ویر پر ټغر د ناستې نړۍ، پر سر، چې اکثریت یې اسلامي هېوادونو دي، د ناپوهۍ خپسې ناستې دي، دوی ټولو په ګډه، له ټرمپ سره د سیاسي تشدد دا عمل غندلی او د ټرمپ د سمدستي روغتیا لپاره خپلې پېرزوینې یې هغه ته استولې دي؛ دنیا د مظلومانو پروړاندې کړه او ړنده ده.
م.م. د امریکا پر کړکیچن وضعیت او امریکا چې په نړۍ کې کوم جنایتونه ترسره کوي ولې چوپ دي، د اوکراین د جنګ لامل امریکا پېژندل کېږي، د فلسطین د ټولوژنې ترشا د امریکا لاس له ورایه څرګند او له اسرائیلو سره په دغه لوی بشري ناورین کې اوږه په اوږه ولاړه ده.
د سوریې او عراق داخلي جنګونه امریکایانو اېجاد کړل او پالنه یې کوي، په لنډه توګه که ووایم، په ټوله نړۍ کې د بشر پر وړاندې که کوم جنایت ترسره کېږي، د امریکایانو لاس لرل پکې حتمي دي، هره مرمۍ چې په دې نړی کې مسلمان پرې وژل کېږي، د امریکایانو تر لاس تېرېږي.
خو م.م په ځانګړي ډول یونما، یوه ورځ هم د امریکا له جنایتونو پرده پورته نه کړه او نه یې په نړۍ کې د بل کړي اور ګوته امریکا ته ونیوله؛ یوناما د لویدیځو قدرتونو یوه سیاسي وسیله او د جاسوسۍ ځاله ده.