د اطلاعاتو او کلتور وزارت په خپره شوې خبر پاڼه کې راغلي چې د ياد وزارت له لوري په پنجشير ولايت کې د سلګونو ځوانانو مشرانو شاعرانو فرهنګيانو او مسولينو په شتون کې د توت مېوې دوديزه او فرهنګي مېله ولمانځل شوه.
د ياد وزارت په وينا د توت میوې دودیزه او فرهنګي غونډه د دې ولایت د ورزشي سټډیوم په څنګ کې په داسې حال کې ولمانځل شوه چې د اسلامي امارت لوړ پوړو مسؤلینو، د هېواد له ګوټ ګوټ څخه راغلو په لسګونو تنه شاعرانو، ادیبانو او فرهنګي څهرو او د پنجشیر سلګونه فرهنګ پاله خلکو پکې ګډون کړی وو.
يادې لمانځغونډې ته د اطلاعاتو او کلتور وزارت مالي او اداري معين مولوي قدرت الله جمال په خپلو خبرو کې له ځوانانو وغوښتل چې د خپلو خلکو خدمت وکړي او زياته یې کړه چې افغانستان د تاريخ په اوږدو کې په بېلابېلو برخو کې ټولې نړۍ ته الګو پاتې شوی او موږ بايد هڅه وکړو ترڅو تېر زرين تاريخ ژوندی او د خپل وطن په پرمختګ او ابادۍ کې خپله ونډه واخلو.
په دې دودیزه مېله کې د ویناوو، د کلمو، شعرونو او همدارنګه توت میوې په اړه د تخصصي خبرو سربیره، د تیاتر او نقاشۍ نندارتونونه هم په لاره واچول شول.
د يادؤنې وړ ده چې د اسلامي امارت له حاکميت راوروسته پنجشېر هم د نور هېواد په څېر د بشپړ حاکميت او امن تر سيوري لاندې دی او په وار وار پکې فرهنګي علمي او کلتوري خپرونې جوړېږي.