د پنجشېر ځايي مسوولین وايي، د طبیعي پېښو د زیانونو د مخنیوي په موخه د دغه ولایت په پینځو ولسوالیو کې د ناروې کمېټې له لوري د ۱۵ پروژو د پلې کولو ترڅنگ د اغا خان بنسټ په دوو ولسوالیو او یو شمېر نورې ملي او نړیوالې موسسې په مرکز او ولسوالیو کې پروژې پلې کوي.
د پنجشېر له ولایت مقام څخه په خپره شوې خبرپاڼه کې ویل شوي، په پنجشېر کې د طبیعي پېښو د زیانونو د مخنیوي او تخریب شوو سیمو او عامه پروژو د بیا رغونې او زیانمنو شوو خلکو سره د مرستې لپاره د پنجشېر په ولایت کې د نړیوالو موسساتو او امارتي ادارو ترمنځ ناسته کې نړیوالو موسساتو په یاده برخه کې د خپلو پروژو معلومات د پنجشېر له والي سره شریک کړل.
د خبرپاڼې له مخې، د ناروې کمېټې مسوولینو ویلي، د پنجشېر په پينځه ولسوالیو، بازارک، لومړۍ حصه، ابشار ، دره او پریان کې ۱۵ پروژې پلې کوي، چې له یوې خوا به د طبیعي پېښو د زیانونو مخه ونیسي او له بله پلوه به خلکو ته د کار زمینه برابره کړي.: «هره پروژه کې به سل تنه ځايي ځوانان په کار بوخت شي، هر کارکوونکي ته ۴۰ کاري ورځې برابروي او په ورځني ډول پينځه امریکايي ډالر ورکوي.»
په خبرپاڼه کې د پنجشېر د والي محمد اغا حکیم له قوله ویل شوي، چې نوموړي له نړیوالو موسسو څخه غوښتي چې په دغه ولایت کې د طبیعي پېښو زیانمن شوو سره مرستې وکړي.:«د پروژو ټاکنه او پلې کولو کې باید دقت وشي، د ولسونو اړتیاوې په نظر کې ونیول شوي او له شته امکانانو باید سمه گټه واخیستل شي.»
نوموړي ویلي، د یادو پروژو د پلې کېدو سربېره به په دغه ولایت کې له هغو ۱۵ کورنیو سره هم مرسته وکړي، چې په روان کال کې د طبیعي پېښو او سیند ته د لوېدلو له امله یې ژوند بایللی و.