په امریکا کې د ملي ګارډ پر دوو تنو عسکرو د برید په پېښه کې د دوو افغانانو نیولو د نړیوالو رسنیو پام ځانته اړولی او له څو ورځو راهیسې لا هم پر دغه موضوع بحثونه کېږي، خو تر ټولو مهم ټکی یې دا دی چې د امریکا حکومت او د کورني امنیت وزیرې کریسټي په یوه خوله د دې پېښې هېڅ تړاو له افغان حکومت سره نه دی ورکړی؛ کریسټي د یادې پېښې په تړاو ویلي وو، چې «رحمان الله لکڼوال ممکن امریکا ته له تګ وروسته سخت دریځه شوی وي». په ټوله کې د امریکا د حکومت دریځ د دې ښکارندوی دی چې یاده پېښه یوازې انفرادي او شخصي مسؤلیت ګڼي.
د امریکایي حکومت د کورني امنیت د وزیرې څرګندونو روښانه کړه، چې د لکڼوال پېښه شخصي جرم دی او عموماً دغسې پېښې او جرمونه په حکومتونو پورې نه تړل کېږي؛ د امریکا د حکومت وضاحت او په دغه پېښه کې د افغان حکومت د نه لاس لرلو د موضوع روښانتیا، د افغان حکومت د ټولو مخالفینو خیالي تحلیلونه او تبلیغات ناسم ثابت کړل.
په داسې حال کې چې د امریکا د کورني امنیت مسؤلیت افغان حکومت ته نه ورګرځي او نه هم امریکا د یادې پېښې پړه پر افغان حکومت اچوي، د مقاومت په نوم خیالي جبهه ډلې بیا هم د شکونو د ایجاد او ناسمو تبلیغاتو هڅه کړې؛ د دغه ډلې د بهرنیو اړیکو مسؤل ادعا کړې وه، چې «(امریکا کې)نیول شوی ترهګر(!) هم ښایي له طالبانو سره اړیکه ولري». دغه خیالي او منزوي ډله هڅه کوي چې له یوه شخصي جرم څخه سیاسي ګته واخلي او سیاسي رنګ ورکړی، تر څو وروسته ځان د نړیوال امنیت ساتنې ته ژمن وښيي او بدیل نمايي وکړي.
د مقاومت منزوي ډلې دا له واقعیت لیرې دریځ د دې ښکارندويي کوي، چې دا ډله په کامله توګه له سیاسي ناکامۍ سره مخ ده؛ دغه ډله یوازې د هېواد د بیا اشغال په هیله ده او د همدې موخې ترلاسه کولو لپاره په هر پېښه کې د افغانانو پر ضد تبلیغات کوي، شخصي جرایمو ته سیاسي بڼه ورکوي او کوښښ کوي چې د بهرنیانو پام افغانستان ته واوړي.
بل پلو بیا د افغان حکومت دریځ د سولې او ثبات عملي انځور دی، د افغان حکومت په اساسي تګلاره کې د هېواد دننه د امنیت ټینګول، د جرایمو او نورو هېوادونو ته د ښکاره ګواښ مخنیوی، د فساد له منځه وړل او د هېواد د ارضي تمامیت ساتنه ده او نور موارد شامل دي. تېر څلور کاله عملي ثبوتونه دي چې افغان خاوره د نړۍ د ډېرو هېوادونو په پرتله د لویو بدو پېښو شاهده نه وه او نه یې هم نورو هېوادونو ته ګواښونه متوجه کړي دي، دا میداني واقعیتونه د مقاومت ډلې ټولې تبلیغاتي ادعاوي کاملاً دروغ او بې ارزښته ثابتوي.
مقاومت جبهې په خپلو غیرمسؤلانه څرګندونو هڅه کړې چې په تېرو څو لسیزو کې د امریکا له لوري ټولو منل شویو افغانانو ته هم ګواښونه متوجه کړي او له ستونزو سره یې مخ کړي؛ د مقاومت ډلې دغسې نا مسؤلانه څرګندونې ښيي چې دوی ته یوازې شخصي ګټې مهمې دي او لومړیتوب ورته لري.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.