د ملګرو ملتونو سازمان د ماشومانو د ملاتړ صندوق (یونیسف) ادارې لخوا د جاپان هېواد په مالي همکارۍ د غزني ولایت په “قره باغ” ولسوالۍ کې دوه بابه ښوونځیو ته ودانۍ جوړېږي، چې ۱۹ میلیونه افغانۍ پرې لګښت راځي.
د غزني ولایت د پوهنې ریاست مسولین وایي، چې دغه ښوونځي د قره باغ ولسوالۍ اړوند “برله” او “سپین کاریز” سیمو کې جوړېږي، چې چارې یې سه شنبې ورځ د جوزا په ۲۲مه نېټه پیل شوې او د کال تر وروستيو پورې به پای ته ورسېږي.
د پوهنې ریاست د نشراتو مسول میاګل صدیق وویل: ” د دغه ښوونځي چې د یونیسف لخوا د جاپان هېواد په مالي همکارۍ جوړېږي، یو یې شپږ تدریسي ټولګي او بل یې ۱۲ تدریسي ټولګي لري، چې د جوړېدو سره به یې د دغې ولسوالۍ ۲۰۰۰ تنو زده کوونکو ته د زده کړې زمینه برابره شي”.
یاده دې وي، چې تېره اونۍ هم د دغه ولایت په “زنه خان” او خوګیاڼیو” ولسوالیو کې د دوو ښوونځیو د جوړولو چارې پیل شوې دي.