د احصایې او معلوماتو ملي اداره وايي، د برېښنايي پېژندپاڼو د وېش لړۍ د پراختیا په برخه کې د خپلې ژمنتیا پر بنسټ په متحده عربي اماراتو کې هم د دې پېژندپاڼو د وېش څانگه فعالوي، چې له فعالېدو سره به یې په دغه هېواد کې مېشتو افغانانو ته لا ډېرې اسانتیاوې برابرې شي.
له یادې ادارې څخه په خپره شوې خبرپاڼه کې ویل شوي، په همدې موخه یې د متحده عربي اماراتو ابوظبي ښار د اسان خدمت تر چتر لاندې د برېښنايي پېژندپاڼو د وېش ډله لېږلې، چې په نږدې ورځو کې به هلته خپل فعالیتونه پیل کړي.
د احصایې او معلوماتو ملي ادارې عمومي مشر ډاکټر فقیر محمد زیار د یادې ډلې د لېږلو پر مهال له دوی غوښتي، چې خپلې چارې په رښتینې ډول تر سره کړي.: «هڅه مو دا ده چې په کور دننه او بهر ټول هېوادوال په اسانۍ سره برېښنايي پېژندپاڼې تر لاسه او له گټو یې برخمن شي.
د دې وېش څانگې فعالېدل په یاده برخه کې مهم ګام دی او د دې پېژندپاڼو د وېش لړۍ پراختیا ته زموږ ژمنیتا ده.»
د یادولو وړ ده، چې د احصایې او معلوماتو ملي ادارې د بهرنیو چارو وزارت سره په بهرنیو هېوادونو کې د مېشتو افغانانو د هویت د تثبیت او د برېښنايي پېژندپاڼو د وېش، له وېش وروسته خدمتونو، زېږون کارتونو او د مړینې د پارچو د وېش په تړاو د تېر ۱۴۰۲ لمریز کال د سلواغې په ۴مه نېټه هوکړهلیک لاسلیک کړی و، چې پر اساس به یې په نږدې راتلونکي کې په ایران او ځينې نورو هېوادونو کې هم د دې برېښنايي پېژندپاڼو وېش څانگې فعالې شي