هندوکشغږ معلومات ترلاسه کړي، چې امرالله صالح غواړي د مقاومت له جبهې خپله لاره جلا او يوه نوې جبهه رامنځته کړي.
د يادو مؤثقو معلوماتو په اساس امرالله صالح په تیرو ورځو کې په تاجکستان کې ظاهر اغبر، غلام بهاء الدين جيلاني او ایوب سالنګي په شمول د مقاومت جبهې له ځينو نورو ناراضو کسانو سره غونډه کړې ده او له اوږدو بحثونو وروسته يې په دې توافق کړی دی چې د مقاومت جبهې څخه خپله لاره جدا کړي او د امرالله صالح په مشرۍ يوه نوې جبهه پرانېزي.
د سرچينې د معلوماتو په اساس، دوی د احمد مسعود د ټيم او د احمد د خانداني جبهې له ځان غوښتنو، تکبر او شهرت پرستۍ ناراضه دي؛ دوی په احمد مسعود او ټيم يې دا انتقاد هم کوي چې له ځينو بهرنيو هیوادونو څخه مرستې اخلي خو يواځې په خپله نږدې حلقه او محدودو کسانو يې ويشي.
دغه مؤثق معلومات ښيي چې امرالله صالح په دې نوې جبهه کې په نظر کې لري چې غلام بهاءالدين جيلاني د پروان د والي په توګه او ايوب سالنګي د شمالي په سطحه مسؤول وټاکي؛ دغه راز دی په پلان کې لري چې حاجي الماس ذاهد د شمالي شوری په نوم له ځان سره يو ځای کړي.
د هندوکش غږ د معلوماتو په اساس، امرالله صالح خپل زياتره کارونه د ظاهر اغبر له لارې ترسره او همغږي کوي.
د شنونکو په باور، د مقاومت او نورو په نوم جبهاتو په منځ کې اختلافات ورځ تر بلې په زياتېدو دي او دوی نشي کولای د ځان غوښتنو، امتيازاتو او د خارجي استخباراتي سازمانونو د مرستو په تقسیم او تمويل يو له بل سره جوړ شي چې له همدې امله ډيری خارجی استخباراتي سازمانونه اوس د موجوده جبهاتو د حمايې پر ځای د نویو جبهاتو د رامنځته کولو او تمويل په لټه کې دي.
صالح په جاسوسۍ کې اوږده مخینه لري او وخت به یې ثابته کړي چې څومره به د بهرنیو استخباراتي سازمانونو باور راخپل کړي او له احمد مسعود څخه به مخکې شي.
د یادونې وړ ده؛ کله چې دغه موضوع بهر ته ووتله او خلک ترې خبر شول، نو ظاهر اغبر د غبرګونونو او حساسیتونو له وېرې د وضاحت په ډول لیکنه وکړه؛ خو حقیقت دا دی چې د جبهې مقدماتي مراحل طی شوي او زیاتره چارې د ظاهر اغبر د دفتر له لارې تنظیمېږي.