د ایران په پلازمېنه تهران کې د فلسطین د اسلامي مقاومت یا حماس د سیاسي دفتر د مشر اسماعیل هنیه له ترور وروسته، په منځني ختیځ کې وضعیت ورځ تر بلې د یوې پراخې جګړې پر لور روان برېښي؛ ایران، اسرائیل د اسماعيل هنیه د ترور مسوول بولي او اسرائیل هم منلې چې دا کار دوی کړی دی؛ ایران خبرداری ورکړی، چې اسرائیل په دې کار سره (د دوی په وینا) سرې کرښې ماتې کړي او ژر به یې غچ واخلي.
له بلې خوا په لبنان، سوریه، عراق او یمن کې د ایران له ملاتړه برخمنې وسله والې ډلې د تیارسي په حالت کې راغلي او ظاهراً ښکاري چې د ایران له خوا پر اسرائیل د کېدونکي برید سره به دوی هم خپل بریدونه پیل کړي؛ ایران او یادې نورې اسلامي مسلح ډلې پر اسرائیل د بریدونو لپاره تر ډېره توغندي او چاودېدونکې ډرون کاروي او د اسرائیل له خوا اشغال شوې سیمې او پوځي اډې په نښه کوي.
بل لور ته د امریکا په مشرۍ غربي هېوادونو برېټانیا، جرمني، فرانسې او ځینو عرب هېوادونو د ایران د برید او توغندیو د شنډولو لپاره چمتووالی ښودلی، سیمې ته یې الوتکې، جنګي بېړۍ او د هوايي دفاع پرمختللي سیستمونه استولي دي.
امریکا د اسرائیل له ټولو جنایتونو، سرغړونو او وحشتونو سره سره، تل له دغه هېواده دفاع کړې او په دې برخه کې یې ان په غرب کې رامنځته شوي ارزښتونه، لکه ډيموکراسي، د بشر حقونه، نړیوال قوانین او ټول اصول تر پښو لاندې کړي او د اسرائیل دفاع ته یې کار ویلی دی.
ایران به پر اسرائیل برید وکړي، خو دا برید به له دوو اړخونو اسرائیل ته ډېر تاوان ونه رسوي؛ له یوه اړخه امریکا او غرب اسرائیل په تر ټولو پرمختللې ټکنالوژۍ او وسلو سمبال کړی چې تر ډېره کولای شي ایراني توغندي او ډرون موخې ته تر رسېدو مخکې له منځه وړلی شي؛ له بلې خوا امریکا او نږدې ټول غرب تر اسرائیل راتاو دي او هلته یې جنګي بېړۍ، الوتکې او نورو د هوايي دفاع سیستمونه نصب کړي چې د تېر ځل په شان به دا ځل هم د ایران د برید مخه ونیسي؛ ښايي ځينې عرب هېوادونه لکه اردون او سعودي عربستان به هم د امریکا د خوشحالولو لپاره د ایران د برید په شنډولو کې ونډه واخلي.
اصلي پوښتنه دا ده چې د اسرائیل پر وړاندې کومه وسیله رغنده او اغېزناکه ده؟ دې پوښتنې ته د ځواب لپاره لاندې څو لارې چارې کارنده دي.
لومړی: اسرائیل په منځني ختیځ کې د امریکا، برېټانیا او په ټوله کې غرب سیوری دی؛ که همدا نن هم د دوی ملاتړ نه وي، اسرائیل ان یوه اونۍ هم په منځني ختیځ کې نه شي پاتې کېدلی، له همدې کبله د اسرائیل د شدیدې کمزورۍ او له منځه وړلو لپاره باید پر اصلي علتونو کار وشي؛ په لومړي قدم کې له سعودي عربستان، کویټ، عراق، سوریې، قطر، اردن او نورو عربي هېوادونو څخه امریکايي اډې و ایستل شي او په دې سره هلته امریکایي حضور وننګول شي.
دوهم: د ترکیې په ګډون ټول اسلامي هېوادونه له اسرائیل سره هر ډول ښکاره او پټې معاملې پرېږدي، سفارتونه بند کړي، پر اسرائیل بندیزونه ولګوي، سوداګریزي راکړې ورکړې ورسره بندې کړي، ځمکنۍ، هوايي او سمندري لارې پر وتړي او دغه راز په هر دول اسرائیلي محصولاتو کلک بندیز ولګول شي.
درېیم: د اسلامي نړۍ هېوادونه او سازمانونه یو ځل خپل تېر برم دبدبې ته وګوري؛ د غلامي توقونه له غاړۍ وباسي؛ دا ومني چې دوی له امریکا پرته هم ژوند کولای شي، هم یې هېواد ساتلی شي، هم یې اقتصاد ژغورلی شي.ښه بېلګه یې اوس د افغانستان اسلامي امارت دی، چې شل کاله یې له امریکا سره ډغرې ووهلې، ماتې یې ورکړه، اوس هم خپل وطن ساتي، هم یې اقتصاد رغولی او هم خپل واک او ځواک لري.
څلورم: د پیاوړو اسلامي هېوادونو له ډلې یو نظامي سازمان جوړ شي؛ لکه څرنګه چې په غرب کې ناټو سازمان دی او په دغه راز روسیي د وارسا تړون جوړ کړی؛ اسلامي هېوادونو ته هم ښايي چې د غرب، اسرائیل او بل هر دښمن د مقابلې لپاره پیاوړی پوځ جوړ کړي چې د فلسطین، عراق، افغانستان په څېر نورو اسلامي هېوادونو ته د ګواښ د متوجه کېدو په صورت کې نظامي مداخله وکړي او پرې نه ږدي چې غرب پر مسلمانانو ظلمونه وکړي.
پنځم: د اسلامي هېوادون د ګډ پوځ د جوړېدو په صورت کې هم د اسرائیل قضیه حل کېږي، هم فلسطین او نورې اسلامي خاورې ازادېږي او هم به مسلمانان په چټکۍ سره په نظامي، سیاسي، اقتصادي او ټولنیز لحاظ خپل تېر برم راژوندی کړي؛ اسلامي امت او اسلامي هېوادونه پراخې مالي، مادي، معنوي، انساني او هر اړخیزې سرچینې او پراخې جغرافیې لري.
د اوسني وضعیت د مدیریت، په منځني ختیځ او نورو ځایونو کې د امریکا، غرب او اسرائیل د بدمعاشۍ د مخینوي او د اسلامي امت د سوکالۍ لپاره په اوس کې همدې څو بدلونونو ته اړتیا لیدل کېږي؛ له دې پرته به مو غرب، اسرائیل او نورو کفار هره ورځ ښکار کوي او موږ به د یو او بل له دفاع څخه ناتوانه یو او لاس تر زنې به ورته ناست یو.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.