د مالیې وزارت وايي، په نیمروز او فراه ولایتونو کې یې یوه اندازه قاچاقي توکي نیولي دي.
له یاد وزارت څخه په خپره شوې خبرپاڼه کې ویل شوي، د نیمروز او فراه ولایتونو د گمرکونو د گرځنده څارنې کارکوونکو د یادو ولایتونو په بېلابېلو سیمو کې یوه اندازه قاچاقي توکي نیولي دي.
د خبرپاڼې له مخې، په نیول شوو توکو کې ۱۸۲۰ کیلوگرامه پاکستاني انساني درمل، ۲۹۷۶۰ پاکټه نشهيي درمل، ۶۰۵ کیلوگرامه رُب، ۲۳ بستې لوبیا، ۳۳۶ کیلوگرامه پلاستیک او ۵۴۳ کیلوگرامه چاکلېټ شامل دي، چې قاچاق کوونکو غوښتل په پټه یې هېواد ته راوړي.
په خبرپاڼه کې ویل شوي، نیول شوي توکي او عاملین یې د نورو څېړنو او اجرااتو په خاطر اړوند گمرکونو ته سپارل شوي دي.
یاد وزارت ډاډ ورکړی چې اوسمهال د هېواد په ټولو لویو لارو کې د مالیې وزارت د گمرکونو لوی ریاست د گرځنده څارنې ډلې فعاله دي او چاته اجازه نه ورکوي چې ممنوعه او قاچاقي توکي صادر او یا وارد کړي.