د ۱۴۰۴ ښوونیز کال په پیل او د ښوونځیو د زدهکوونکو په یونیفورم کې له بدلون سره، یو شمېر هغه کسان چې په تېرو وختونو کې یې هم د اسلامي ارزښتونو او کلتور سره په مخالفت کې رول درلود، په ټولنیزو پاڼو کې جنجالونه جوړ کړي دي. موخه یې دا وه چې د ځینو هېوادوالو له بې خبرۍ څخه په ناوړه ګټه اخیستنې سره، د بګړۍ او اسلامي سمبولونو په اړه منفي ذهنیت رامنځ ته کړي. له بده مرغه یو شمېر ښاریان په قصدي یا غیر قصدي توګه د دې تبلیغاتو په دام کې ولویدل او نوی یونیفورم یې د منلو وړ و نه باله.
په دې اړه څو پوښتنې د مطرح کولو وړ دي؛ لومړی، له هغو کسانو چې له دې پریکړې سره مخالفت لري باید وپوښتل شي: هغه یونیفورم چې پخوا په ښوونځیو کې رواج و، د کوم کلتور پر بنسټ تنظیم شوی و او ریښه یې چېرته رسیږي؟ ایا بګړۍ او لونګۍ د اسلامي کلتور برخه نه ده او له دیني بزرګانو څخه موږ ته نه ده را رسیدلې؟
دویم، که د پخواني یونیفورم اغوستل اجباري وو، نو ولې په هغه وخت کې د مخالفت غږ پورته نه شو؟ اوس چې نوی پوښاک زموږ له دیني او کلتوري ارزښتونو سره سمون لري، څه ستونزه لري چې په رسمي او الزامي توګه وي؟
درېیم، بګړۍ او لونګۍ د پیغمبر صلی الله علیه وسلم له سنتونو څخه دي، په داسې حال کې چې پتلون او یخنقاق د لویدیځ تمدن محصول دی. لومړی ځل، دا پوښاک په بریتانیا کې د زده کوونکو لپاره د رسمي یونیفورم په توګه اجباري شو او وروسته یې نورو هېوادونو ته هم سرایت وکړ.
په داسې زمانه کې چې پردي کلتورونه په مختلفو وسایلو سره اسلامي ټولنو ته ننوتي دي، اړینه ده چې مسلمانان د هر وخت په پرتله خپلو دیني او کلتوري ارزښتونو ته زیاته پاملرنه وکړي او هغه د ژوند په ټولو برخو کې ژوندي وساتي.
که نن ورځ اسلامي یونیفورم ځینو ته نا اشنا یا غیرعادي ښکاري، نو باید پوه شو چې دا د دښمنانو د کلونو فکري هڅو پایله ده چې موږ له خپل اسلامي هویت څخه لیرې کړي. اوس وخت رارسیدلی چې په ویاړ سره خپل کلتور نړۍ ته معرفي کړو او د نوي نسل په زړونو کې د اسلامي ارزښتونو مینه او باور ورکړو.
راځئ چې په قوي عزم او ارادې سره خپل ځوان نسل له اصلي اسلامي کلتور سره اشنا کړو او هغوی ته ور زده کړو چې دا کلتور نه یواځې د ساتنې او درناوي وړ دی، بلکې باید په نړۍواله کچه زموږ د هویت او عزت د نښې په توګه وپیژندل شي.
بې له شکه، هر هغه زدهکوونکی چې په اسلامي یونیفورم کې ښوونځي ته ننوځي، د اسلامي کلتور ته د وفادارۍ او له پردي کلتور څخه د بې نیازۍ روښانه پیغام له ځان سره لري.
اوس وخت رارسیدلی چې په لوړ او وياړلي غږ سره خپل اسلامي کلتور ولمانځو او د اسلامي لباس په اغوستلو سره وښیو چې موږ د دې هویت او کلتور وفادار بچیان یو.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.